Athugið þessi frétt er meira en 1 mánaða gömul.

Einstæðir foreldrar og einbúar oftast í fjárhagsvanda

Mynd með færslu
 Mynd: Andrew Neel - Pexels
Fjöldi fullorðinna á heimili virðist hafa lykiláhrif á fjárhag þess og börn hafa fyrst og fremst áhrif á fjárhaginn ef aðeins einn fullorðinn býr á heimilinu, samkvæmt niðurstöðum sem kynntar voru í dag á vef Hagstofu Íslands.

Þetta er á meðal þess sem fram kemur í niðurstöðum sérheftis félagsvísa Hagstofu Íslands um fjárhag heimila þar sem fjallað er um lágtekjuhlutfall, byrði húsnæðiskostnaðar og skort á efnislegum gæðum út frá heimilisgerð og stöðu á húsnæðismarkaði.

Fjárhagsstaða þeirra sem leigja almennt lakari

Heimili einstæðra foreldra og einmenninga eru því líklegust til að búa við fjárhagsþrengingar. Auk þess virðist staða á húsnæðismarkaði hafa áhrif en fjárhagsstaða þeirra sem búa í leiguhúsnæði er almennt verri en þeirra sem búa í eigin húsnæði.

Hlutfall einstæðra foreldra undir lágtekjumörkum hækkað

Hlutfall undir lágtekjumörkum hefur ekki breyst mikið í heild sinni á tímabilinu 2016 til 2019 en þegar litið er á einstakar heimilisgerðir sést að lágtekjuhlutfallið hefur hækkað hjá einstæðum foreldrum en lækkað eða ekki breyst hjá öðrum heimilisgerðum. Árið 2019 voru 37,5% einstæðra foreldra undir lágtekjumörkum samanborið við 13,7% heimila þar sem einn barnlaus fullorðinn bjó, 8,4% heimila tveggja fullorðinna með börn og 6,5% heimila tveggja eða fleiri barnlausra fullorðinna.

Íþyngjandi húsnæðiskostnaður algengastur meðal einstæðra foreldra

Einnig kemur fram að íþyngjandi húsnæðiskostnaður er algengastur á meðal einstæðra foreldra, eða 36,3%, og þarnæst hjá einmenningsheimilum eða 23,4%. Af heimilum tveggja fullorðinna með börn eru 10,6% með íþyngjandi húsnæðiskostnað og 6,4% heimila tveggja eða fleiri barnlausra fullorðinna.

Auknar líkur á fjárhagsþrengingum ef búið er í leiguhúsnæði

Heimili í leiguhúsnæði eru mun líklegri til þess að vera undir lágtekjumörkum heldur en heimili í eignarhúsnæði. Þá er íþyngjandi húsnæðiskostnaður mun algengari á meðal leigjenda en á meðal eigenda húsnæðis sem og skortur á efnislegum gæðum. Heimili einstæðra foreldra eru líklegust til þess að vera í leiguhúsnæði og einmenningsheimili næstlíklegust, segir á vef Hagstofunnar.

Jón Agnar Ólason