ÁTVR tilkynnir um meint brot vefverslana

09.06.2021 - 11:26
Mynd með færslu
 Mynd: Ragnar V - RÚV
ÁTVR tilkynnti í gær sýslumanninum á höfuðborgarsvæðinu og sýslumanninum á Vesturlandi um meint lögbrot Bjórlands ehf., Brugghúss Steðja ehf. og Sante ehf. með smásölu áfengis í vefverslunum.

ÁTVR telur að fyrirtækin hafi brotið gegn þeim skyldum sem á þeim hvíla samkvæmt áfengisheildsölu-, áfengisframleiðslu- og áfengisinnflutningsleyfum. „Með tilkynningunum var farið fram á að sýslumennirnir hæfu þegar í stað áminningarferli gagnvart þessum aðilum eins og leyfisveitanda er skylt að gera. Lög kveða á um að leyfishafi sem verður uppvís að frekari brotum á meðan áminning er í gildi skuli sviptur leyfinu um stundarsakir eða fyrir fullt og allt,“ segir í tilkynningu frá ÁTVR.

Útiloka ekki að leita til dómstóla og krefjast lögbanns

Með tilkynningunum segist ÁTVR vilja fá niðurstöðu í þann ágreining sem uppi er um túlkun gildandi laga um heimildir til smásölu áfengis. „ÁTVR útilokar ekki að leita síðar til dómstóla vegna hinna meintu brota og krefjast eftir atvikum lögbanns á vefverslanir Bjórlands, Brugghúss Steðja og Sante,“ segir jafnframt í tilkynningu ÁTVR. 

Telja verslanirnar brjóta gegn einkaleyfi ÁTVR

ÁTVR metur það svo að með því að starfrækja vefverslanir brjóti verslanirnar gegn einkaleyfi og grunnstoðum áfengisstefnu stjórnvalda um hlutverk ÁTVR og bendir á að fram hafi komið tillaga á Alþingi sem fól í sér að hægt yrði að selja áfengi beint til íslenskra neytenda úr innlendum vefverslunum. Tillagan hafi ekki fengið framgang og áfengisstefnunni hafi ekki verið breytt. „Mismunandi skoðanir kunna að vera varðandi þá niðurstöðu en engum er þó frjálst að hunsa gildandi lög að eigin geðþótta,“ segir í tilkynningunni. 

Öll vefverslun með áfengi beint af innlendum lager brjóti í bága við einkarétt ÁTVR, óháð þjóðerni þess sem stendur fyrir vefversluninni. „Hins vegar er aðilum óháð þjóðerni heimilt að selja einstaklingum áfengi til einkanota, í takmörkuðu magni úr vöruhúsi sem staðsett er erlendis. Þá er það einstaklingurinn sjálfur sem stendur fyrir innflutningi áfengisins og greiðir skatta og skyldur.“

hildurmj's picture
Hildur Margrét Jóhannsdóttir
Fréttastofa RÚV