Tilnefnd til Tónlistarverðlauna Norðurlandaráðs

Mynd með færslu
 Mynd: Samsett mynd - RUV

Tilnefnd til Tónlistarverðlauna Norðurlandaráðs

08.06.2021 - 15:18

Höfundar

Þorgerður Ingólfsdóttir kórstjóri og Víkingur Heiðar Ólafsson píanóleikari eru tilnefnd af hálfu Íslands til tónlistarverðlauna Norðurlandaráðs 2021. Færeyingar tilnefna söngkonuna Eivöru Pálsdóttur. 13 listamenn og hópar sem skapað hafa einstakar tónlistarupplifanir hljóta tilnefningar til verðlaunanna. Í hópnum eru meðal annars söngvarar, þjóðlagatónlistarkona, trompetleikari, píanóleikari, fjölhljóðfæraleikari og plötusnúðahópur

Tónlistarverðlaun Norðurlandaráðs hafa verið veitt frá árinu 1965. Þeim er ætlað að vekja athygli á tónlistarsköpun og tónlistarflutningi sem telst hafa mikið listrænt gildi að því er segir í tilkynningu Norðurlandaráðs.

Breitt svið norrænnar tónlistar

Tilnefningar ársins endurspegla breitt svið norrænnar tónlistar – allt frá óperu, sígildri tónlist og djassi til house- og popptónlistar. Hér eru alþjóðlegar stjörnur sem hafa átt þátt í að koma Norðurlöndum á heimskort tónlistarinnar; öflugar raddir, hljóðfærasnillingar, skapandi hæfileikafólk með mikla tónlistargáfu og gamalgrónir listamenn með áralangan feril að baki. Um öflugan hóp er að ræða og hafa nokkrir listamannanna verið tilnefndir til verðlaunanna áður.

Verðlaunin afhent á þingi Norðurlandaráðs í nóvember

Verðlaun Norðurlandaráðs 2021 verða kynnt og afhent í tengslum við þing Norðurlandaráðs 2. nóvember. Verðlaunahafinn hlýtur að launum verðlaunagripinn Norðurljós og 300 þúsund danskar krónur.

Fimm verðlaun veitt árlega

Norðurlandaráð veitir árlega bókmenntaverðlaun, kvikmyndaverðlaun, tónlistarverðlaun, umhverfisverðlaun og barna- og unglingabókmenntaverðlaun. Í tilkynningu Norðurlandaráðs segir að markmiðið sé að vekja athygli á verkefnum sem hafi skarað fram úr á sviði lista eða umhverfismála og að auka áhuga á norrænu menningarsamfélagi og samstarfi um umhverfismál.