Athugið þessi frétt er meira en 4 mánaða gömul.

Lögreglan hefur miklar áhyggjur af manneklu

Mynd með færslu
 Mynd: Eggert Þór Jónsson - RÚV
Lögreglumenn hafa miklar áhyggjur af manneklu í lögreglunni og hættulega lágu hlutfalli lærðra lögreglumanna í lögregluliði landsins. Ljóst sé að staða löggæslu á Íslandi hafi versnað til muna eftir að stytting vinnuvikunnar tók gildi um síðustu mánaðamót.

Þetta kemur fram í yfirlýsingu stjórnar Landssambands lögreglumanna, sem birt var á vef sambandsins í gær. Þar lýsir stjórnin miklum áhyggjum af þeirri stöðu sem lögreglan standi frammi fyrir. Allt of fáir lögreglumenn séu við störf og hlutfall lærðra lögreglumanna í þeim hópi hættulega lágt.

Er þetta rakið til vanefnda ríkisvaldsins á loforðum og samningum um fjármagn til að bregðast við styttingu vinnuvikunnar með ráðningu á viðbótarmannskap. Þetta valdi því að færri lögreglumenn séu á vakt hverju sinni, sem dragi verulega úr öryggi lögreglumanna og almennings.

Krefjast þess að ríkið standi við gerða samninga

„Þegar samið var um styttri vinnuviku fyrir vaktavinnufólk hlýtur ríkisvaldinu að hafa verið ljóst að ráða þyrfti fleiri lögreglumenn til starfa og setja aukið fé í menntun lögreglumanna,“ segir í yfirlýsingunni. „Lögreglumenn krefjast þess að ráðamenn standi við gerða samninga og veiti það fjármagn sem þarf til þess að manna lögregluna með viðunandi hætti.“
 

Ævar Örn Jósepsson
Fréttastofa RÚV