Athugið þessi frétt er meira en 4 mánaða gömul.

Segir ósvífni ÍFF og Play smita út á vinnumarkaðinn

28.05.2021 - 15:50
Mynd með færslu
 Mynd: Guðmundur Bergkvist - RÚV
Drífa Snædal, forseti ASÍ segir að ÍFF, Íslenska flugstéttafélagið, beri öll merki þess að vera gult stéttarfélag. Þeir sem sömdu kjarasamning flugfreyja og flugþjóna séu ekki þeir sem eiga að sinna störfunum sem hann snýr að. Ósvífni ÍFF og Play gagnvart launafólki muni smitast út um allan vinnumarkaðinn ef ekki verði spyrnt við fótum.

Þetta kemur fram í pistli Drífu á vefsíðu ASÍ í dag. Hún segir að gul stéttarfélög séu félög sem eru undir áhrifavaldi atvinnurekenda og stofnuð til höfuðs óháðum og raunverulegum stéttarfélögum.

„ÍFF, sem flugfélagið Play hefur samið við, ber öll merki þess að vera gult stéttarfélag enda er það nú orðið ljóst að svokallaðir kjarasamningar fyrir flugfreyjur og -þjóna voru ekki gerðir af þeim sem áttu að vinna samkvæmt kjarasamningunum. Nokkrir flugmenn sömdu fyrir flugfreyjur og -þjóna. Fólkið sem á að vinna samkvæmt þessum samningi var víðs fjarri. Flugfélagið Play hefur svo neitað að hitta eina raunverulega stéttarfélag flugfreyja og -þjóna, félag sem hefur sannanlega staðið með sínum félögum, hefur stuðning frá öðrum stéttarfélögum innan Alþýðusambandsins og sótt styrk í heildarsamtökin. Þetta vita fyrrum flugfreyjur og -þjónar hjá WOW air mæta vel. Þau muna vel þegar Flugfreyjufélag Íslands, með stuðningi frá ASÍ, lánaði félögum sínum peninga þegar launagreiðslur brugðust eftir gjaldþrot WOW air, þangað til ábyrgðasjóður launa var búinn að greiða skaðann,“ segir í pistlinum.

Þá segir Drífa að meint ósvífni félagsins í garð launafólks geti smitast út um allan vinnumarkaðinn.

 

„Hin ótrúlega ósvífni ÍFF og Play gagnvart launafólki á Íslandi mun smitast út um allan vinnumarkaðinn ef ekki er staðið hraustlega gegn tilraunum til að brjóta á bak aftur frjáls stéttarfélög sem vinna raunverulega að hag félagsmanna sinna. Baráttan mun halda áfram og standa þangað til Play gerir raunverulegan kjarasamning við raunverulegt stéttarfélag. Því lofa ég en verð jafnframt fyrsta manneskjan til að fagna samkeppni á flugmarkaði sem byggist á raunverulegri viðskiptalegri samkeppni en ekki samkeppni um hverjum takist að greiða lægstu launin.“ segir í pistlinum.