Athugið þessi frétt er meira en 4 mánaða gömul.

Vinna að fyrirbyggjandi aðgerðum vegna gróðurelda

Mynd með færslu
Mynd úr Heiðmörk 5. maí. Mynd: Aðsend mynd
Húsnæðis- og mannvirkjastofnun hefur sett á laggirnar starfshóp um varnir gegn gróðureldum. Honum er ætlað að vinna að fyrirbyggjandi aðgerðum vegna gróðurelda. Er það helst í formi forvarna og fræðslu, segir í tilkynningu frá stofnuninni.

Þá kortleggur hópurinn einnig nauðsynlegar breytingar á lögum og reglugerðum er snerta gróðurelda og stuðla að breytingum þar sem þess reynist þörf. Auk þess er stefnt að því að auka viðbúnað slökkviliðs og almennings.

Slökkvilið um allt land hafa sinnt 67 útköllum vegna gróðurelda frá 9. apríl og í fyrsta sinn hefur verið lýst yfir hættustigi vegna hættu á gróðureldum. Það var gert í kjölfar umfangsmikilla elda í Heiðmörk fyrr í mánuðinum.  

„Ljóst er að gróðureldaváin er komin til að vera, m.a. fyrir tilstilli hnattrænnar hlýnunar sem og aukinnar gróðursældar hér á landi. Slökkvilið og viðbragðsaðilar hafa brugðist hratt við krefjandi aðstæðum en styrkja þarf stoðir og bæta búnað þess fólks sem sinnir slökkvistarfi og björgunaraðgerðum,“ segir í tilkynningu stofnunarinnar.

Starfshóp um varnir gegn gróðureldum skipa Almannavarnadeild ríkislögreglustjóra, Félag slökkviliðsstjóra, Húsnæðis- og mannvirkjastofnun (HMS), Lögreglustjórafélag Íslands, Samband íslenskra sveitarfélaga, Skipulagsstofnun, Skógræktin, Veðurstofa Íslands og Verkís.