Rótin hlaut Mannréttindaverðlaun Reykjavíkurborgar

Efst frá vinstri:
 Andrea Marel Þorsteinsdóttir, frístundamiðstöðinni Tjörninni, Dagur B. Eggertsson, borgarstjóri, Anna Kristinsdóttir, mannréttindastjóri Reykjavíkurborgar, Guðrún Kaldal, framkvæmdastjóri frístundamiðstöðvarinnar Tjarnarinnar, Dóra Björt Guðjónsdóttir, formaður mannréttinda-, nýsköpunar- og lýðræðisráðs, Hrefna Þórarinsdóttir, forstöðumaður hinsegin félagsmiðstöðvar Tjarnarinnar og Samtakanna ’78, Þorbjörg Þorvaldsdóttir, formaður Samtakanna ´78, Guðrún Ebba Ólafsdóttir, ráðgjafi hjá Rótinni og Kristín I. Pálsdóttir, talskona og framkvæmdastjóri Rótarinnar.
 Mynd: Reykjavíkurborg
Rótin, félag um konur, áföll og vímugjafa, hlaut í dag Mannréttindaverðlaun Reykjavíkurborgar. Verðlaunin eru veitt einstaklingum, félagasamtökum eða stofnunum sem valnefnd telur hafa staðið vörð um mannréttindi á eftirtektarverðan hátt. 

Markmið Rótarinnar er að stofna til umræðu um konur, fíkn, áföll, ofbeldi og geðheilbrigði og huga að sérstökum meðferðarúrræðum fyrir konur. 

Í umsögn valnefndar kemur fram að Rótin hafi haft mikil áhrif á umræðuna með uppbyggilegri og rökstuddri gagnrýni, ekki síst á staðnað meðferðarkerfi. Félagið hafi hvatt hið opinbera til nútímalegrar stefnumótunar og aukins gæðaeftirlits og skrifað fjölda erinda til stjórnvalda, eftirlitsaðila og annarra sem koma að þessum málaflokki. 

Kristín I. Pálsdóttir, talskona og framkvæmdastjóri Rótarinnar, tók við verðlaununum í dag. Hún sagði mikilvægt að viðurkenna mannréttindi þessa jaðarsetta hóps. 

Fulltrúum Hinsegin félagsmiðstöðvar, Samtakanna ´78 og Tjarnarinnar voru svo veitt hvatningarverðlaun mannréttinda-, nýsköpunar- og lýðræðisráðs. Hvatningarverðlaunin eru veitt fyrir þróunar- og nýbreytnistarf einstaklinga, borgarstofnana og fyrirtækja á sviði mannréttinda- og lýðræðismála fyrir verkefni sem þykja stuðla að auknu jafnræði, vinna gegn margþættri mismunun og leggja áherslu á jafna stöðu allra kynja.

andriyv's picture
Andri Yrkill Valsson
Fréttastofa RÚV