Athugið þessi frétt er meira en 1 mánaða gömul.

Útköll að Landspítala vegna fólks sem var til vandræða

Mynd með færslu
 Mynd: Birgir Þór Harðarson
Lögreglan á höfuðborgarsvæðinu þurfti tvisvar að hafa afskipti af fólki sem var til vandræða á sjúkrahúsum borgarinnar í gærkvöld og í nótt.

Um hálfníu í gærkvöld var óskað eftir aðstoð lögreglunnar á Landspítalanum við Hringbraut. Í dagbök lögreglu kemur fram að þar hafi einstaklingur, í annarlegu ástandi verið til vandræða. Sá var vistaður í fangageymslu uns af honum rennur.

Sams konar tilkynning barst á þriðja tímanum í nótt þegar lögregla var kölluð að bráðamóttökunni í Fossvogi og fékk sá einnig að gista fangageymslur þar til af honum rynni.

Eitthvað var um umferðaróhöpp á höfuðborgarsvæðinu en engin slys urðu á fólki auk þess sem allnokkrir ökumenn voru stöðvaðir vegna gruns um akstur undir áhrifum fíkniefna. Einnig var tilkynnt um innbrot í hús og bíla.

markusthth's picture
Markús Þ. Þórhallsson
Fréttastofa RÚV