
Áfram bannað að grilla
Að öðru leyti er hættan óbreytt og því áfram í gildi hættustig á sunnan- og vestanverðu landinu, frá Breiðafirði að Eyjafjöllum. „Það er byggt á fyrirliggjandi veðurspá og þeirri staðreynd að víðast hefur úrkoman ekki náð langt niður í jarðveginn og hann áfram þurr. Samkvæmt veðurspá eru NA áttir framundan með áframhaldandi þurkum. Hættustig almannavarna verður því áfram í gildi á þeim svæðum sem það náði til eða frá Breiðafirði að Eyjafjöllum,“ segir í nýrri tilkynningu fra almannavörnum.
Óvissustigi var fyrst lýst yfir vegna gróðurelda 6. maí og svo hækkað upp í hættustig þann 11. maí. Þetta er í fyrsta sinn sem hættustig er í gildi hér á landi vegna hættu á gróðureldum.
Samhliða hættustigi almannavarna er í gildi bann við meðferð opins elds á hættusvæðum; á sunnan- og vestanverðu landinu og á Norðurlandi vestra. Þar er því óheimilt að kveikja eld, svosem að grilla eða vinna með verkfæri sem hitna mikið eða valda neista.
Eftirfarandi kemur fram í tilkynningu frá almannavörnum:
Almenningur og sumarhúsaeigendur á skilgreindum svæðum eru hvattir til að:
- Ekki kveikja eld innan sem utandyra (kamínur, grill, varðeldar, flugeldar og fleira)
- Ekki nota einnota grill sem og venjuleg grill
- Kanna flóttaleiðir við sumarhús
- Huga að brunavörnum (slökkvitæki, reykskynjarar) og gera flóttaáætlun
- Ekki vinna með verkfæri sem hitna mikið eða valda neista
- Fjarlæga eldfim efni við hús (huga að staðsetningu gaskúta)
- Bleyta í gróðri kringum hús þar sem þurrt er