Athugið þessi frétt er meira en 1 mánaða gömul.

Mál Kolbeins ekki tilkynnt til lögreglu

Mynd með færslu
 Mynd: Birgir Þór Harðarson
Erindi sem fagráði Vinstri grænna barst vegna hegðunar og framkomu Kolbeins Óttarsonar Proppé í garð kvenna var ekki álitið það alvarlegt að ástæða væri til að tilkynna það til lögreglu.

Þetta kemur fram í yfirlýsingu frá fagráðinu. Þar segir að í verklagsreglum sé gert ráð fyrir að ef grunur sé um refsivert athæfi sé máli vísað til lögreglu, sem hafi ekki átt við í þessu máli. Ráðinu hafi borist erindi á vormánuðum og það sé það fyrsta sem ráðinu hafi borist frá því að það tók til starfa árið 2019.

„Nú á vormánuðum barst fagráði VG erindi vegna ámælisverðrar hegðunar Kolbeins Óttarssonar Proppé, þingmanns VG. Við meðferð málsins var farið eftir verklagsreglum sem tilgreindar eru í aðgerðaáætlun VG gegn einelti og kynferðislegri og kynbundinni áreitni og ofbeldi. Í verklagsreglum er gert ráð fyrir að ef grunur sé um refsivert athæfi sé máli vísað til lögreglu, sem ekki átti við í þessu máli. Fagráðið vann að málinu í samráði við málshefjanda, en trúnaður ríkir um mál sem fagráðinu berast. Er þetta eina málið sem hefur borist fagráðinu frá því það tók til starfa árið 2019. Verklagsreglurnar og aðgerðaáætlunin eru aðgengilegar á heimasíðu VG,“ segir í tilkynningu fagráðsins.