Athugið þessi frétt er meira en 4 mánaða gömul.

Smitrakningarappið fær andlitslyftingu og bláar tennur

11.05.2021 - 13:26
Mynd með færslu
 Mynd: RÚV
Búið er að uppfæra virkni smitrakningarforritsins fyrir snjalltæki þannig að það nýtir nú bluetooth-virkni snjalltækja til að styðja við rakningu smita. Talsverðar tafir hafa verið á þessari uppfærslu.

Þessi nýja útgáfa appsins gerir smitrakningarteyminu kleift að rekja hugsanleg smit þar sem tengsl milli aðila eru ekki þekkt og því erfiðara að rekja. Fyrstu hugmyndir um þennan bluetooth-eiginleika komu fram fyrir tæpu ári og hefur gengið hægt að koma því í kring og tafir orðið á uppfærslunni. Meðal annars tóku tæknifyrirtækin Apple og Google fyrir það að bluetooth-virkni væri sett í íslenska rakningarappið og að þau væru sjálf að þróa nýja tækni fyrir alla síma. Forstjóri Persónuverndar sagði í byrjun apríl að gögn frá Embætti landlæknis hafi borist síðar til Persónuverndar en látið var uppi opinberlega. Því hafi ferlið tafist nokkuð. 

Rakning C-19-appið notar bluetooth-merki símtækja til að reikna út fjarlægð milli tækja. Símarnir skiptast á ópersónugreinanlegum upplýsingum, eða svokölluðum lyklum, auk þess sem appið sækir reglulega upplýsingar um lykla sem hafa verið sendir frá öðrum tækjum. Ef sá sem sýkist af COVID-19 er með appið biður rakningarteymi almannavarnadeildar viðkomandi að senda lykla úr appinu. Ef sími sækir upplýsingar um lykil sem hann hefur séð áður fara útreikningar af stað sem meta líkur á útsetningu.

Ef símarnir hafa verið í minna en tveggja metra fjarlægð í 15 mínútur kemur upp tilkynning um hugsanlega útsetningu. Viðtakandi getur svo fylgt leiðbeiningum í appinu um skráningu í smitgát og jafnframt fengið boð í sýnatöku.

„Smitrakning hefur skipt sköpum í viðureign okkar við heimsfaraldur COVID-19. Á þessum tímapunkti, þegar margir hafa fengið bólusetningu og fyrirsjáanlegt er að samfélag okkar verði opnara og að meira verði um ferðalög hingað til lands, er einkar mikilvægt að smitrakning verði áfram skilvirk og árangursrík. Þær breytingar sem fyrirsjáanlegar eru, t.d. varðandi aðgerðir innanlands og á landamærum, munu gera smitrakningu flóknari. Ný útgáfa Rakning C-19 er liður í að auðvelda þá vinnu,“ segir í tilkynningu frá Ölmu Möller landlækni og Þórólfi Guðnasyni sóttvarnalækni. 

Engin afsláttur er sagður gefinn af vernd persónuupplýsinga og öryggismálum. Öll gögn verði áfram vistuð á símtækinu sjálfu en ekki í gagnagrunni. Gögnunum er svo eytt úr appinu að 14 dögum liðnum.