Athugið þessi frétt er meira en 1 mánaða gömul.

Kom illa fram við konur og hættir við framboð

11.05.2021 - 20:16
Mynd með færslu
 Mynd:
Kolbeinn Óttarsson Proppé, þingmaður Vinstri grænna, hefur dregið framboð sitt til baka í forvali flokksins í Reykjavík. Kolbeinn segir frá því í færslu á Facebook í kvöld að hann hafi komið illa fram við konur og að kvartað hafi verið undan hegðun hans til fagráðs VG.

„Læt konum líða eins og þær hafi ekki skipt mig máli“

Hann segist hafa átt það til að vera kaldur og fjarlægur við konur, þrátt fyrir að ný sambönd hafi gjarnan farið af stað „eins og flugeldar“. „Ég hef gefið til kynna langtímasamband, byggt á heitum og djúpum tilfinningum. Og þær hafa verið það. En svo hleyp ég í felur, brest undan. Hugsa meira um að verja mig mögulegum skaða en það hvernig ég kem fram. Geri það því illa, kem illa fram. Læt konunum líða eins og þær hafi ekki skipt mig máli, sem er kolrangt. Að þær geri það ekki lengur, sem er líka kolrangt. Skríð inn fyrir skelina mína og í öryggið og einmanaleikann þar,“ skrifar þingmaðurinn. 

Hann segist á sama tíma hafa verið einmana og hræðst það að verða alltaf einn. „Minn mesti ótti er að ég sé dæmdur til að vera einn af því að ég geti ekki gefið það af mér sem þarf til að koma í veg fyrir einmitt það.“

Hefur verið leitað til fagráðs flokksins vegna Kolbeins

„Á dögunum var leitað til fagráðs VG með kvartanir vegna hegðunar minnar. Það ferli sem þá fór af stað opnaði augu mín fyrir því að ýmislegt hefur verið ábótavant í minni hegðun. Ég ákvað engu að síður að gefa kost á mér í forvali Vinstri grænna í Reykjavík. Umræða undanfarinna daga hefur hins vegar gert það að verkum að ég hef endurskoðað þá ákvörðun,“ skrifar hann.

Hann segist ekki geta staðið bæði með sjálfum sér og með konunum sem líður illa hans vegna á meðan hann er í framboði fyrir VG.  „Og Vinstrihreyfingin – grænt framboð, eða nokkur þar innan borðs, á ekki að þurfa að svara fyrir mína hegðun,“ skrifar hann. 

Biðst afsökunar

Hann segist einn bera ábyrgð á hegðuninni. „Mér þykir leitt hvernig ég hef hagað mér, ég biðst afsökunar á því. Það góða kom út úr þessu öllu að ég er að leita mér aðstoðar til að ráða betur við samskipti og tengsl og mun halda því áfram. Það er hins vegar best fyrir öll að ég boði brottför mína úr hinu opinbera rými í haust. Ég dreg framboð mitt í forvali Vinstri grænna í Reykjavík til baka og verð því ekki í framboði í kosningunum. Ég þakka öllu því góða fólki sem hvatti mig og studdi og þykir leitt að valda því vonbrigðum.

Ég hef ýmislegt að læra og mun leggja mig fram við að verða að betri manni. Ég vona að þessi ákvörðun mín verði til einhvers góðs,“ segir að lokum.

Ætlaði að láta reyna á Reykjavík

Kolbeinn sóttist eftir því að leiða lista flokksins í Suðurkjördæmi en lenti í fjórða sæti og ákvað að taka ekki sætið. Hann tilkynnti í kjölfarið að hann myndi bjóða sig fram í Reykjavík. 

 

hildurmj's picture
Hildur Margrét Jóhannsdóttir
Fréttastofa RÚV