Athugið þessi frétt er meira en 1 mánaða gömul.

Um 200 Skagfirðingar skimaðir í dag

10.05.2021 - 23:19
Mynd með færslu
 Mynd: RÚV
Um tvö hundruð Skagfirðingar voru skimaðir fyrir COVID-19 í dag og hátt í fjögur hundruð eru í sóttkví. Eina skipulagða hópskimun dagsins var í tengslum við leikskóla á Sauðárkróki þar sem smit hafði greinst, en margir fóru sjálfir í skimun vegna einkenna eða til að gæta öryggis. Þetta segir Stefán Vagn Stefánsson, yfirlögregluþjónn á Norðurlandi vestra, í samtali við fréttastofu.

Alls hafa nú greinst átta smit í Skagafirði á síðustu dögum, öll á Sauðárkróki. Öllu skólahaldi hefur verið aflýst þessa viku, leikskóli lokaður nema fyrir forgangshópa eins og börn heilbrigðisstarfsmanna, lögreglu og sjúkraflutningamanna.

Þær tilslakanir sem tóki gildi á landinu í dag, þegar fjöldatakmörk voru rýmkuð úr 20 í 50, taka ekki til sveitarfélagsins Skagafjarðar og sveitarfélagsins Akrahrepps. Öll próf í Fjölbrautarskóla Norðurlands vestra á Sauðárkróki verða heimapróf og skólinn lokaður nemendum og heimavistin rýmd. Sundlaugar og íþróttamannvirki loka og æfingum verður hætt fram yfir næstu helgi.

Stefán Vagn segir að í gær hafi verið tekin um 150 sýni í Skagafirði og önnur 150 daginn þar áður. „Þannig að þetta eru heilmargir.“ Ekki sé enn búið að greina öll þau tvö hundruð sýni sem tekin voru í dag.