Keppni hafin í Skólahreysti

Keppni hafin í Skólahreysti

04.05.2021 - 16:33
Keppni í Skólahreysti árið 2021 fer af stað á Akureyri í dag. Keppt verður í tveimur riðlum, klukkan 17:00 og 20:00. Skólarnir sem keppa eru 18 talsins, allir á Norður- og Austurlandi.

Í Skólahreysti keppa fjórir fulltrúar frá hverjum skóla í þrautum sem reyna á þol og styrk. Strákar keppa í upphífingum og dýfum, stelpur keppa í armbeygjum og hreystigreip þar sem markmiðið er að hanga sem lengst á járnstöng. Lið skipað stelpu og strák fer svo í gegnum hraðþrautina þar sem krakkarnir þurfa að hoppa, hlaupa, skríða og lyfta áður en þau enda á að fara upp kaðal. 

Í fyrri riðli þriðjudagsins, klukkan 17, mættu Árskóli, Blönduskóli, Egilsstaðaskóli, Grunnskólinn á Þórshöfn, Grunnskólinn austan Vatna, Grunnskóli Fjallabyggðar, Húnavallaskóli og Nesskóli til keppni.

Þar var það Grunnskólinn austan Vatna sem fór með sigur af hólmi en keppendur frá skólanum náðu stórgóðum tíma í hraðaþrautinni og sigruðu sömuleiðis í dýfunum. Húnavallaskóli endaði í öðru sæti og Egilsstaðaskóli í því þriðja eftir æsispennandi keppni. 

Í seinni riðlinum, sem hefst klukkan 20, mæta svo krakkar úr Brekkuskóla, Dalvíkurskóla, Giljaskóla, Glerárskóla, Lundarskóla, Naustaskóla, Oddeyrarskóla, Þelamerkurskóla, Valsárskóla og Varmahlíðarskóla. 

Sigurvegari síðasta árs í Skólahreysti er Lindaskóli í Kópavogi. Sigurinn var þó naumur því aðeins munaði einu stigi á skólunum í tveimur efstu sætunum, Lindaskóla og Holtaskóla í Keflavík.