Skipar starfshóp um uppbyggingu við gosstöðvarnar

Mynd með færslu
 Mynd: Bjarni Rúnarsson - RÚV
Þórdís Kolbrún Reykfjörð Gylfadóttir, ferðamála- og iðnaðarráðherra, hefur sett á fót starfshóp sem ætlað er að koma með tillögur um uppbyggingu eldgosasvæðisins í Geldingadölum til skemmri og lengri tíma.

Skarphéðinn Berg Steinarsson, ferðamálastjóri, stýrir starfi hópsins en þar verða einnig fulltrúar landeigendafélaganna, Grindavíkurbæjar, Umhverfisstofnunar, Veðurstofunnar, almannavaradeildar ríkislögreglustjóra og lögreglunnar á Suðurnesjum.

„Á meðan gosið stendur verður áframhaldandi aðsókn að svæðinu en eftir að því lýkur má gera ráð fyrir að það verði vinsæll áfangastaður ferðamanna til frambúðar og að þetta svæði verði fjölsóttur ferðamannastaður. Öll þessi uppbygging þarf að þola álag ferðamanna allan ársins hring,“ segir í tilkynningu frá ráðuneytinu.

Gert er ráð fyrir að hópurinn skili frumtillögum sínum til starfshóps til verndar innviðum vegna eldsumbrota á Reykjanesi, sem stýrt er að ráðuneytisstjóra forsætisráðuneytisins, 30. apríl. Lokatillögur hópsins eiga að liggja fyrir ekki síðar en í lok ágúst.

„Nú þegar hefur verið gripið til bráðaaðgerða á svæðinu af hálfu Grindavíkurbæjar auk þess sem veitt hefur verið  fé af fjárheimild Framkvæmdasjóðs ferðamannastaða til uppbyggingar á svæðinu. Mikilvægt er hins vegar að hugað verði að fyrirkomulagi á svæðinu til langs tíma en jafnframt að gripið verði til nauðsynlegra bráðaaðgerða og skýrari mynd fengin á aðkomu ólíkra aðila til frambúðar,“ segir í tilkynningunni.

ingvarthor's picture
Ingvar Þór Björnsson
Fréttastofa RÚV