Athugið þessi frétt er meira en 5 mánaða gömul.

Fimm andófsmenn í Hong Kong dæmdir í fangelsi

17.04.2021 - 06:34
epa09139055 Former lawmaker Albert Ho (C) is surrounded by reporters as he leaves the West Kowloon court buildings in Hong Kong, China, 16 April 2021. Albert Ho was given a suspended 12-month sentence for his role in an unauthorized assembly during anti-government protests in 2019. He is among nine democracy activists that were on trial and sentenced on 16 April.  EPA-EFE/JEROME FAVRE
Albert Ho, fyrrverandi stjórnarandstöðuþingmaður, fékk 12 mánaða skilorðsbundið fangelsi. Hér sést hann fyrir utan réttarsalinn, umkringdur stuðningsfólki og fréttamönnum. Mynd: EPA-EFE - EPA
Fimm þekktir og áhrifamiklir lýðræðissinnar og andófsmenn í Hong Kong voru í gær dæmdir til fangelsisvistar fyrir aðild sína að hörðum, fjölmennum og langvarandi mótmælum í borginni árið 2019. Fjölmiðlakóngurinn Jimmy Lai er í hópi fimmmenninganna, sem voru sakfelldir fyrr í þessum mánuði ásamt fjórum öðrum, þótt refsing þeirra væri ekki tilkynnt fyrr en í gær. Hann var dæmdur til 14 mánaða fangelsisvistar.

Þetta er fyrsti fangelsisdómurinn yfir Lai, sem er 73 ára gamall og hefur beitt fjölmiðlum sínum til að berjast fyrir lýðræði og sjálfstæði Hong Kong um áratuga skeið. Hann var upphaflega dæmdur fyrir að skipuleggja og hvetja til fjölmennustu mótmæla í sögu borgarinnar, sem skipuleggjendur fullyrða að um 1,7 milljónir manna hafi tekið þátt í.

Martin Lee, 82 ára lögmaður og stundum kallaður „faðir lýðræðisins“ í Hong Kong var einnig í hópi hinna sakfelldu, en hann var á sínum tíma fenginn til þess af yfirvöldum í Peking að aðstoða við gerð eins konar stjórnarskrár fyrir Hong Kong, sem nú er aðeins sjálfsstjórnarhérað að nafninu til.

Margaret Ng, 73 ára lögmaður og fyrrverandi þingkona stjórnarandstöðunnar, var líka í hópi sakfelldra. Þau Lee og Ng voru bæði dæmd til fangelsisvistar, en dómur þeirra er skilorðsbundinn, rétt eins og 12 mánaða fangelsisdómurinn yfir fyrrverandi stjórnarandstöðuþingmanninum Albert Ho.