Halli Reynis - Söngur vesturfarans

Mynd: Halli Reynis / Halli Reynis Minningarsíða

Halli Reynis - Söngur vesturfarans

12.04.2021 - 15:00

Höfundar

Söngur vesturfarans er tíunda plata tónlistarmannsins Halla Reynis og jafnframt hans síðasta, en hann lést 52 ára að aldri í september 2019. Halli lagði grunninn að plötunni Söngur vesturfarans með meistaraverkefni sínu sem hann vann á árinu 2015 og hafði hugmyndir um að gera meira úr eftir að platan kæmi út.

Söngur vesturfarans er verkefni eins og fyrr sagði sem nær aftur til ársins 2015 og er beint framhald af lokaverkefni Halla í meistaranámi hans við menntavísindasvið Háskóla Íslands, en þetta var í fyrsta sinn sem hluti útskriftarverkefnis frá menntavísindasviði var verklegur. Verklegi hluti lokaverkefnisins var í formi söngleiks þar sem í fimm frumsömdum lögum og textum ásamt lesinni sögu var sögð saga vesturfaranna sem fluttu frá Íslandi og vestur um haf í kringum aldamótin 1900.

Eftir útskrift frá háskólanum fékk Halli þá hugmynd að gefa út plötu með lögunum úr söngleiknum og samdi þá fleiri lög um sama efni svo úr yrði tíu laga plata. Árið 2017 tók hann upp vinnuupptökur af þessum lögum sem hann ætlaði eingöngu að nota sem demó og stóð til að hefja raunverulegu upptökurnar á lögunum um það leyti sem Halli féll frá í september 2019. Halli lagði mikla áherslu á að textarnir yrðu góðir og einhverjir textar höfðu tekið breytingum frá því vinnuupptökurnar voru gerðar, en þar sem ákveðið var að nota upptökurnar frá 2017, þá eru það upprunalegu útgáfurnar af textunum sem hljóma á plötunni.

Eftir fráfall Halla kom fljótt upp sú hugmynd að halda áfram með þessa vinnu og gefa plötuna út. Gulli tvíburabróðir Halla tók að sér að leiða verkefnið og kom fljótt í ljós að vel var hægt að nota vinnuupptökurnar með söng og gítarleik Halla sem grunn og fengi rödd hans því að hljóma á þessu síðasta tónlistarverki hans.

Jóhann Ásmundsson fékk það verkefni að stjórna upptökum ásamt því að spila og útsetja, Sigurgeir Sigmundsson spilaði á gítara og kom einnig að útsetningum laganna ásamt þeim Vigdísi Jónsdóttur, Erik Quick og Dan Cassidy sem öll lögðu hönd á plóg.

Söngur vesturfarans er plata vikunnar að þessu sinni og verður spiluð í heild sinni ásamt kynningum Gunnlaugs Reynissonar bróður Halla á Rás 2 eftir 10-fréttir í kvöld og er aðgengileg í spilara.