Athugið þessi frétt er meira en 6 mánaða gömul.

Vakt verður við gosstöðvarnar til miðnættis

Mynd með færslu
 Mynd: Arnar Páll Hauksson
Lögregla og Björgunarsveitir vakta gosstöðvarnar í Geldingadölum miðnættis en þar verður lokað klukkan 21 í kvöld. Rýming svæðisins hefst tveimur tímum síðar og ætlað að henni verði lokið um miðnætti.

Þetta kemur fram á Facebook-síðu lögreglunnar á Suðurnesjum. Í dag er búist við suðaustan og sunnan 5 til 10 metrum á sekúndu á gosstöðvunum, snjókomu með köflum og hita við frostmark. Rétt ofan við jörð er áttin þó suðvestlægari. 

Gasmengunina ætti því að leggja yfir Vatnsleysuströnd í fyrstu, en seinnipartinn yfir svæðið frá Vogum að Reykjanesbæ og vestur að Höfnum. Í kvöld snýst í austan og norðaustan 5 til 10 metra á sekúndu og styttir upp í kvöld. Þá berst mengunin í átt til Grindavíkur.

Lögregla áréttar enn að svæðið er hættulegt og þá ekki síst vegna lélegra loftgæða. Gönguleiðin þangað hefur einnig reynst mörgum erfið en lögregla getur án fyrirvara lokað fyrir alla umferð inn að gosstöðvunum.

Gasmengun við gosstöðvarnar getur alltaf farið yfir hættumörk, mökkurinn leggst undan vindi og því öruggast að horfa til eldstöðva með vindinn í bakið. Velja þarf gönguleið eftir vindaspá hverju sinni.

Fólk er hvatt til að fylgjast með loftgæðamælingum á vefnum loftgaedi.is og leiðbeiningum frá Almannavörnum. Hættusvæði við gosstöðvarnar hefur verið merkt inn á kort sem hægt er að nálgast á Facebook síðu lögreglu og á vefsíðu Veðurstofu Íslands.

Svæðið er ekki fyrir lítil börn, þau eru viðkvæm og nær jörðinni en þeir sem eldri eru og því útsett fyrir skaðlegum lofttegundum. Hið sama á við um hunda. Lögregla áréttar jafnframt að þau sem klæða sig ekki vel hafi ekkert inn á svæðið að gera.

Í hægviðri, undir fimm metrum á sekúndu, getur gas safnast fyrir í dalnum, þá stjórnast vindafar af landslagi og gas getur verið yfir hættumörkum langt upp í hlíðar, allan hringinn í kringum gosstöðvarnar.

Þegar svo háttar til þurfa áhorfendur að færa sig upp á fjöll og hryggi en ekki halda sig í brekkunum fyrir ofan.