Athugið þessi frétt er meira en 1 mánaða gömul.

AstraZeneca afhendir helmingi færri skammta en til stóð

epa09074881 (FILE) - A vial of AstraZeneca's Covid-19 vaccine stored in Movianto in Oss, The Netherlands, 12 February 2021 (reissued 14 March 2021). The Dutch health ministry on 14 March 2021 said it was suspending the AstraZeneca vaccine rollout, just days after pressing ahead with its use.  EPA-EFE/Remko de Waal
 Mynd: EPA-EFE - ANP
Lyfjaframleiðandinn AstraZeneca hefur tilkynnt að um það bil helmingi færri skammtar bóluefnis þess verði afhentir ríkjum Evrópusambandsins í næstu viku en til stóð. Það eigi einnig við um Noreg og Ísland.

Þetta kemur fram í frétt Financial Times, sem segist hafa skjöl undir höndum sem sýni þessa stöðu, og að niðurskurði afhendingarinnar verði dreift jafnt yfir öll þau ríki sem áttu að fá bóluefnið.

Áætlun AstraZeneca sem gefin var út um miðjan mars gerði ráð fyrir að í komandi viku yrðu afhentar 2,6 milljónir skammtar en þeir verða ekki nema 1,3 milljónir.

Talsmenn fyrirtækisins tjáðu Evrópusambandinu í síðustu viku að gera þyrfti prófanir á efninu í sendingunni og að henni yrði fljótlega komið til skila. Jafnframt var fullyrt að staðið yrði við loforð um 70 milljónir skammta á öðrum ársfjórðungi.

Tafirnar eru áfall fyrir ríki Evrópu þar sem hægar hefur gengið að bólusetja fólk en í Bandaríkjunum, Bretlandi og Ísrael. Bóluefnið er þó ekki jafnmikilvægt bólusetningaráætlunum ríkjanna á öðrum ársfjórðungi en þeim fyrsta.

Í frétt Financial Times er haft eftir einstaklingi sögðum kunnugur samskiptum lyfjafyrirtækisins og ríkjasambandsins að nánast ekkert yrði afhent af bóluefninu í næstu viku og að þannig myndi framhaldið verða.

Leiðtogar ríkja Evrópusambandsins hafa ekki getað leynt óánægju sinni vegna þessarar þróunar.

Mario Draghi, forsætisráðherra Ítalíu, sagði AstraZeneca ekki hafa útskýrt þennan skyndilega og óvænta samdrátt í afhendingu og ýjaði að því að fyrirtækið hefði jafnvel selt sama skammtinn tvisvar eða þrisvar sinnum.

Talsfólk AstraZeneca þvertók fyrir það og benti á að bóluefnið hefði verið þróað, framleitt og afhent án nokkurs fjárhagslegs ávinnings fyrir fyrirtækið.