Athugið þessi frétt er meira en 2 mánaða gömul.

„Úrskurður héraðsdóms alvarleg aðför að sóttvörnum“

Mynd með færslu
 Mynd: Læknafélag Íslands - Lækanfélag Íslands
Læknafélag Íslands vill að Alþingi breyti lögum svo sóttvarnir haldi í kjölfar þess að Héraðsdómur Reykjavíkur úrskurðaði að lagastoð skorti fyrir reglugerð ráðherra um dvöl fólks frá áhættusvæðum í sóttkvíarhóteli. Tryggja þurfi lagastoð fyrir ítrustu sóttvörnum.

Reynir Arngrímsson, formaður Læknafélags Íslands, segir athygli vekja að dómari skuli ekki hafa valið þá leið að hafa dóminn fjölskipaðan með hið minnsta einn sérfræðing á sviði sóttvarna.   

„Úrskurður héraðsdóms er alvarleg aðför að sóttvörnum landsins og úrræðum sem þarf að vera hægt að grípa til á óvissu- og hættutímum.“ Alþingi verði að tryggja heilbrigðisyfirvöldum óyggjandi heimildir til aðgerða þegar alvarlegar farsóttir geisi. 

„Ljóst hefur verið um alllangt skeið að einstaklingar, ferðamenn og að einhverju leyti aðstandendur þeirra, sem hafa ekki virt sóttvarnartilmæli, hafa verið aðalveikleikinn í sóttvörnum landsins,“ segir hann.

Hann segir opinberar tilkynningar sýna að ríflega 131 milljón hafi veikst og 2,8 milljónir látist af völdum COVID-19. Þar af séu yfir 17 þúsund heilbrigðisstarfsmenn sem sé óþekkt nema helst í stríði eða styrjöldum.

Nýgengi smita á Íslandi hafi farið hækkandi vegna smita tengdum skæðari afbrigði faraldursins sem brýnt sé að stemma stigu við með öllum tiltækum ráðum. „Góðum árangri er því ógnað vegna lagatæknilegra mistaka í meðförum Alþingis á sóttvarnarlögum,“ segir Reynir.

Hann kveðst vonast til að niðurstöðunni verði hnekkt af æðra dómsstigi en sóttvarnalæknir hefur ákveðið að kæra niðurstöðu Héraðsdóms Reykjavíkur til Landsréttar.