Athugið þessi frétt er meira en 4 mánaða gömul.

Frítekjumark námsmanna hækkar um 46 þúsund krónur

Mynd með færslu
 Mynd: Brodie Vissers - burst.shopify.com/Creative commo
Í nýjum úthlutunarreglum sjóðsins fyrir skólaárið 2021 til 2022 kemur fram að frítekjumark námsmanna verði 1.410 þúsund krónur sem er hækkun um 46 þúsund krónur frá síðasta ári. Framfærsla, húsnæðisbætur og barnastyrkur hækka um 3,45% með hliðjón af verðlagsbreytingum 

Þetta kemur fram í tilkynningu frá Mennta- og menningarmálaráðuneytinu í dag og að framfærsluviðmið námslána hafi hækkað umfram verðlag. Menntasjóður námsmanna tók við af Lánasjóði íslenskra námsmanna fyrir um ári. 

Auk framangreinds lækka skilyrði fyrir undanþágu vegna námsframvindu vegna örorku úr 75% í 50% hlutfall. Áfram geta námsmenn sem skráðir eru í bakvarðasveit óskað eftir að tekjur vegna þeirrar vinnu verði dregnar frá við útreikning á námslána.

Nemendur í staðnámi erlendis er heimilað að fá viðbótarframfærslu eða staðaruppbót í þeim löndum þar sem verulega munar á íslenskri framfærslu og framfærslu í viðkomandi landi.

Heimilt verður að nýta viðbótarskólagjaldalán vegna náms sem skipulagt er sem samfellt nám lengur en 5 ár, líkt og nám í læknisfræði, óháð námsári. Með þessari heimild er sagt komið til móts við gengisbreytingar á skólagjöldum án þess að hækka hámark skólagjaldalána.

Eitt markmiða menntasjóðs er að auka jafnrétti til náms og bæta fjárhagsstöðu námsfólks meðan á námi stendur og eftir að því lýkur. Unnið hafi verið að því að færa kjör námsmanna nær neysluviðmiðum

Ríkisstjórnin samþykkti í gær að fela hópi ráðuneytisstjóra að vinna tillögur að hækkun framfærslu námsmanna og skila tillögum þar að lútandi fyrir 1. maí næstkomandi. Á næstu vikum verði stigin skref í þá átt að færa framfærsluviðmið námslána í átt að almennrik kaupmáttaraukningu. 

„Ég tel hækkun framfærslu námsmanna nauðsynlega og góða fjárfestingu yfir samfélagið, ekki síst í ljósi markmiða okkar um framtíðarvöxt hagkerfisins og langtímaatvinnustig ungs fólks.“ segir Lilja Alfreðsdóttir mennta- og menningarmálaráðherra.

Umsóknarfrestur fyrir námslán á vormisseri er nú 15. janúar, 15. júní fyrir sumarmisseri og 15. september fyrir haustmisseri.