Athugið þessi frétt er meira en 1 mánaða gömul.

Breytingarnar á landamærunum sem taka gildi 1. apríl

Mynd með færslu
 Mynd: Rúnar Snær Reynisson - RÚV
Á morgun 1. apríl gengur í gildi ný reglugerð um sóttkví og einangrun og sýnatöku við landamæri Íslands vegna COVID-19. Margvíslegt nýmæli fylgir reglugerðinni.

Hver og einn sem kemur til landsins telst vera ferðamaður eða farþegi, hvort sem viðkomandi er búsettur hér eða ekki. Því gildir reglugerðin um alla sem til landsins koma. 

  • Allir sem koma til landsins þurfa að fara í sýnatöku. Einu gildir hvaðan er ferðast eða á hvaða aldri ferðamaðurinn er.
  • Þau sem hafa vottorð um bólusetningu eða fyrra smit skulu fara í sýnatöku. Viðkomandi er gert að vera í heimasóttkví uns neikvæð niðurstaða liggur fyrir úr sýnatöku. 
  • Allir þurfa að fara í sóttkví eftir skimun á landamærunum og í aðra skimun að sóttkví lokinni nema þau sem hafa gilt bólusetningarvottorð eða vottorð um fyrra smit. 
  • Börn sem eru fædd árið 2005 eða síðar þurfa að fara í sýnatöku. Barn sem ferðast með einhverjum þeim sem ber að dvelja í sóttkví skal vera þar einnig.
  • Barnið losnar úr sóttkvínni eftir að fyrir liggur að neikvætt, síðara sýni úr samferðamanninum. Sé sá undanþeginn sóttkví er barnið það einnig. Barn sem eitt er á ferð þarf ekki að fara í sóttkví. 
  • Hver sá sem kemur frá eða hefur dvalið í meira en sólarhring síðastliðna 14 daga á svæði þar sem 14 daga nýgengi smita á hverja 100.000 íbúa er yfir 500 eða fullnægjandi upplýsingar um svæðið liggja ekki fyrir, svokölluð dökkrauð eða grá svæði, skulu dvelja í sóttkví í sóttvarnahúsi.
  • Þeim sem koma frá löndum sem ekki eru á lista yfir dökkrauð eða grá svæði er heimilað að vera í sóttkví í heimahúsi þar til neikvæð niðurstaða úr síðari sýnatöku liggur fyrir.
  • Sóttvarnalæknir birtir lista yfir lönd eða svæði sem eru dökkrauð og grá. Leiðbeiningar um heimasóttkví er að finna á vef embættis landlæknis
  • Sóttvarnalæknir getur veitt undanþágu frá dvöl í sóttkví í sóttvarnahúsi vegna mjög sérstakra aðstæðna, svo sem fatlaðra barna, enda sé tryggt að það komi ekki niður á smitvörnum. Almennt er ekki gert ráð fyrir því að undanþágur séu veittar frá dvöl í sóttvarnahúsi.
  • Gjald verður innheimt frá 11. apríl fyrir hvert herbergi sem nemur 10.000 kr. og er matur innifalinn. Gjaldið er það sama fyrir herbergi og fæði, hvort sem fólk dvelur þar eitt eða með öðrum sem það ferðast með.
  • Fyrstu tíu daga apríl-mánaðar þurfa þau sem dvelja í sóttvarnarhúsi ekki að greiða fyrir dvölina.
  • Þeim sem þurfa að fara í sóttvarnahús er boðið upp á flutning þangað með hópbifreiðum. Hafi fólk einkabíl til ráðstöfunar er því heimilt að aka sjálft í sóttvarnahús en brýnt er að fara þangað rakleiðis og án tafar. Óheimilt er að fara út af sóttvarnarhúsi meðan á sóttkví stendur.
  • Heimilt er að koma smámunum, til dæmis tölvum og afþreyingarefni, til þeirra sem dvelja í sóttvarnarhúsi, með milligöngu starfsfólks.

Reglugerðin fellur úr gildi 30. apríl næstkomandi.