Með nokkur hundruð herbergi á sóttvarnahótelum á leigu

30.03.2021 - 13:08
Mynd: RÚV / RÚV
Nokkur hundruð herbergi í Reykjanesbæ og í Reykjavík í farsóttarhúsum hafa verið tekin á leigu af yfirvöldum fyrir ferðalanga frá rauðum löndum sem eiga að dvelja í sóttkví. Von er á fréttatilkynningu von bráðar um hvaða hús ræðir. Einnig er verið að undirbúa leigu á farsóttarhúsi á Akureyri og fyrir austan, segir heilbrigðisráðherra. Hún telur húsnæði tryggt fyrir nógu marga fyrstu dagana, eins og hún orðar það.

„Við erum að miða við þennan hóp sem er að koma frá þeim löndum þar sem faraldurinn er í mestum uppgangi,“ segir Svandís Svavarsdóttir, heilbrigðisráðherra og nefnir sem dæmi Pólland, Spán, og Svíþjóð.

Allir sem koma frá rauðum löndum eiga að gista á sóttvarnarhóteli í sóttkví frá og með fimmtudeginum. Frá og með 11. apríl verður innhemt gjald fyrir að gista á sóttvarnarhóteli. Nú er unnið að því að manna hótelin og mun Rauði krossinn sjá um vinnu á hótelunum að mestu leyti. 

Nýjar reglur teknar upp um mánaðamót

Í dag voru kynntar nýjar sóttvarnarreglur sem taka gildi strax á fimmtudag.

  • Próf verða tekin hjá börnum fædd 2005 eða síðar.
  • Gerð verður krafa um að farþegar sem framvísa bólusetningarvottorði eða vottorði um fyrri sýkingu fari í eina sýnatöku við komuna til landsins.
  • Gerð verður krafa um að farþegar sem framvísa bólusetningarvottorði eða vottorði um fyrri sýkingu fari í eina sýnatöku við komuna til landsins.
  • Ferðamenn sem koma frá skilgreindum áhættusvæðum skulu dvelja í sóttkví eða einangrun í sóttvarnahúsi milli fyrri og síðari sýnatöku.
  • Allir ferðamenn skulu forskrá fyrir komuna til landsins hvaða dag þeir fara aftur af landi brott, liggi það fyrir.
  • Frá og með 11. apríl verður innheimt gjald af ferðamönnum fyrir dvöl í sóttvarnahúsi. 

Fréttin var leiðrétt 13:15