Ráðið í fullt starf við almannavarnir á Norðausturlandi

Mynd með færslu
 Mynd: Lögreglan á NA-landi
Hermann Karlsson, aðalvarðstjóri hjá Lögreglustjóranum á Norðurlandi eystra, hefur verið ráðinn í fullt starf til að sinna verkefnum við almannavarnir. Ráðningin er tímabundin í fyrstu og er til næstu áramóta.

Embætti Lögreglustjórans á Norðurlandi eystra og Almannavarnardeild Ríkislögreglustjóra sameinast um verkefnið og er Hermann í 50% starfshlutfalli hjá hvorum. Hann verður með starfsaðstöðu á Akureyri.

Verkefni tengd almannavörnum hafa verið vaxandi þáttur í starfsemi lögreglunnar á Norðurlandi eystra og hafa óveður, jarðhræringar og Covid þar verið áberendi. „Hermann hefur komið mikið að þessum málaflokki undanfarin ár hjá lögreglunni á Norðurlandi eystra og starfað í aðgerðastjórn þegar hún er virkjuð. Þá hefur hann komið að gerð viðbragðsáætlana og æfinga og átt í miklum samskiptum við aðra viðbragðsaðila á starfssvæðinu,“ segir í tilkynningu frá Lögreglunni á Norðurlandi eystra.

„Helstu hlutverk sem hann mun sinna, auk þeirra sem greint er frá hér að ofan, er meðal annars að efla aðgerðastjórnir á landsvísu samkvæmt nýútkominni stefnu stjórnvalda í almannavarna- og öryggismálum. Þá mun hann koma að vinnu við yfirferð á viðbragðsáætlun hvað óveður varðar  á landsvísu og skoða með hvaða hætti hægt sé að auðvelda viðbragðsaðilum að nálgast upplýsingar úr viðbragðsáætlunum á ögurstundu.“

agusto's picture
Ágúst Ólafsson
Fréttastofa RÚV