Athugið þessi frétt er meira en 6 mánaða gömul.

Fólki ráðið frá stikuðu leiðinni vegna mengunar

Mynd með færslu
 Mynd: Jakob Vegerfors
Nóttin var nokkuð róleg við gosstöðvarnar í Geldingadölum að sögn Guðmundar Eyjólfssonar, vettvangsstjóra Lögreglunnar á Suðurnesjum í Grindavík. Nú í morgunsárið er fólk þó byrjað að arka af stað í átt að eldstöðvunum, en vindáttin snýr þannig að gosmökkurinn er yfir stikuðu leiðinni.

Mengunin er því ansi mikil og á köflum hættuleg segir Guðmundur. Fólki er því ráðið frá því að ganga stikuðu leiðina að svo stöddu, og er björgunarsveitarfólk og lögregla á vettvangi til að leiðbeina fólki með það.

Um og upp úr hádegi er svo búist við norðan- og norðaustanátt á gossvæðinu, 13 til 18 metrum á sekúndu, með hríðarveðri. 

Hált er á gönguleiðinni og þurfti að flytja einn á sjúkrahús eftir að hann hafði dottið í hálkunni í nótt. Hann náði ekki að ganga sjálfur að veginum og fékk aðstoð björgunarsveitarmanna að Suðurstrandarvegi, þar sem sjúkrabíll beið hans. Annar göngumaður var einnig fluttur með sjúkrabíl í gærkvöld eftir að hafa runnið í hálkunni.