Athugið þessi frétt er meira en 1 mánaða gömul.

Þetta eru nýju reglurnar sem taka gildi á miðnætti

Mynd með færslu
 Mynd: Tmaximumge - Wikipedia
Ríkisstjórnin hefur ákveðið að grípa til stórhertra sóttvarnaaðgerða í ljósi aukinnar útbreiðslu smita af völdum breska afbrigðis kórónuveirunnar. Ákvörðun heilbrigðisráðherra byggist á tillögum sóttvarnalæknis.

Sóttvarnarlæknir lagði til að gripið yrði tafarlaust til ráðstafana vegna hópsýkinga innanlands að undanförnu til að sporna gegn frekari útbreiðslu veirunnar. Hertar reglur munu gilda í þrjár vikur.

Meginreglan verður tíu manna fjöldatakmörkun og aðeins börn fædd 2015 og síðar undanskilin þeirri reglu. Öllum er skylt að nota andlitsgrímur og tryggja skal tveggja metra regluna.

Samkomutakmarkanir: 

  • Grunn-, framhalds-, tónlistar- og háskólum verður lokað uns páskafrí tekur við. Unnið verður að reglum um fyrirkomulag skólahalds að loknu páskafríi á næstu dögum. 
  • Trú- og lífsskoðunarfélögum er heimilt að taka á móti 30 gestum við athafnir. Gestir skulu skráðir með nafni, kennitölu og símanúmeri en þurfa ekki að sitja í númeruðum sætum.
  • Hámarksfjöldi í erfidrykkjum, fermingarveislum og sambærilegum viðburðum er tíu manns.

Þessu verður lokað:

  • Sund- og baðstöðum er gert að loka og það sama á við um heilsu- og líkamsræktarstöðvar. 
  • Óheimilt verður að stunda íþróttir inni og úti, jafnt barna og fullorðinna, sem krefjast meiri nálægðar en tveggja metra eða þar sem hætta er á snertismiti vegna sameiginlegs búnaðar.
  • Sviðslistir og sambærileg starfsemi, svo sem bíó, eru óheimil og skemmtistaðir, krár, spilasalir og spilakassar skulu vera lokaðir.
  • Ökunám og flugnám með kennara verður óheimilt.

Veitingastaðir og verslanir:

  • Veitingastaðir mega hafa opið til klukkan 22, með að hámarki tuttugu gesti í rými sem allir skulu skráðir og fá afgreiðslu í númeruð sæti.
  • Vínveitingar skal bera til sitjandi viðskiptavina en heimilt er að taka á móti nýjum gestum til klukkan 21.
  • Verslanir mega taka á móti 5 einstaklingum á hverja 10 fermetra og að hámarki 50 manns. Tuttugu starfsmenn mega vera í sama rými og viðskiptavinir. Virða skal tveggja metra nándarreglu og grímuskyldu.
  • Áfram verður heimilt að hafa hársnyrtistofur, snyrtistofur og sambærilega starfsemi opnar.

Áfram gildir tveggja metra nándarregla

  • Nándarregla verður áfram tveir metrar og reglur um grímuskyldu eru óbreyttar. Sem fyrr verða börn fædd 2005 og síðar undanþegin grímuskyldu en þau falla undir fjölda- og nálægðartakmarkanir.
  • Hópsýkingarnar að undanförnu eru allar af völdum breska afbrigðis kórónaveirunnar sem er mun meira smitandi en flest önnur afbrigði og veldur frekar alvarlegum veikindum.
  • Sóttvarnalæknir leggur áherslu á að hertar aðgerðir taka nú til barna allt frá grunnskólaaldri þar sem sýnt þykir að breska afbrigðið veldur meiri einkennum hjá eldri börnum en önnur afbrigði veirunnar.

Í tilkynningu ráðuneytisins kemur fram að annars sé í meginatriðum um að ræða sömu reglur og tóku gildi 31. október á liðnu ári og gáfust vel til að kveða niður þriðju bylgju faraldursins hér á landi.