Danskeppni Samfés er keppni ungs fólks á aldrinum 10-18 ára. Markmiðið er að hvetja ungt fólk á landsvísu til þess að koma fram á þessum viðburði með sinn eigin dansstíl. Keppt er í einstaklings- og hópakeppni í aldursskiptum hópum. Keppendur sýna frumsaminn dans og sjá alfarið um alla þá þætti sem snúa að því að sýna opinberlega fullbúið dansatriði og alla umgjörð dansatriðisins.

„Undirbúningurinn fyrir keppnina í kvöld hefur síðustu daga snúist mest um að klára búningahönnun en dansinn samdi ég fyrir nokkrum vikum og hef æft hann reglulega,“ segir Katrín Ýr Erlingsdóttir keppandi úr félagsmiðstöðinni Ekkó í Kópavogi. Hún hefur stundað dans frá þriggja ára aldri þegar hún steig sín fyrstu dansspor í ballett. Katrín segir keppnina mikilvæga fyrir unglinga. Það sé mikill lærdómur fólginn í því að koma fram fyrir framan aðra og undirbúa sitt eigið atriði.

Í ár er metþátttaka í danskeppninni sem hefur svo sannarlega slegið í gegn á síðustu árum. Samtals eru skráðir 70 keppendur sem koma af öllu landinu. 

Keppnin verður í beinu streymi á UngRÚV.is kl. 19:30