Athugið þessi frétt er meira en 7 mánaða gömul.

Íslensk teiknimynd tilnefnd til Óskarsverðlauna

Mynd með færslu
 Mynd: Gísli Darri - CAOZ

Íslensk teiknimynd tilnefnd til Óskarsverðlauna

15.03.2021 - 12:35

Höfundar

Já-fólkið, teiknimynd Gísla Darra Halldórssonar, er tilnefnd til Óskarsverðlauna.

Já-fólkið er tilnefnd til verðlaunanna í flokki styttri teiknimynda. Gísli Darri Halldórsson leikstýrði og skrifaði handritið að myndinni og framleiðendur eru Arnar Gunnarsson og Gísli Darri fyrir framleiðslufyrirtækið Caoz.

Mynd með færslu
 Mynd: - - Oscars

Myndin fjallar um íbúa í ónefndri blokk. Fólkinu er fylgt eftir í einn sólahring en þegar líða tekur á daginn fer lífsmunstur hvers og eins að kristalla persónurnar (dugnaður, leti, fíkn og ástríða). Myndinni er lýst sem gamansamri, hálf-þögulli teiknimynd um fjötra vanans. Einungis eitt orð kemur fyrir í henni, það er orðið „já“ sem er endurtekið í ýmsum blæbrigðum.

Rætt var við Gísla Darra í Lestinni á Rás 1 þegar ljóst var að teiknimyndin var í forvali tilnefndra mynda. „Þegar ég var að byrja á þessari mynd var ég með hóp af hugmyndum sem ég var heltekinn af. Ég upplifði þetta ferli eins og ég væri smali að reyna að koma rollum heim. Þær virtust á yfirborðinu ekki tengjast og eitt af því fyrsta sem kom upp á yfirborðið var sjálfskapaður frasi sem ég var óskaplega stoltur af,“ sagði hann. „Röddin er ríkari en orðið. Það var byrjunin.“

Óskarsverðlaunin verða afhent 25. apríl.

Tengdar fréttir

Kvikmyndir

Hjólin þegar farin að snúast eftir forval til Óskars

Kvikmyndir

Já-Fólkið bíður svars frá Óskarsakademíunni