Athugið þessi frétt er meira en 3 mánaða gömul.

Ungur maður grunaður um nettælingu gegnum tölvuleiki

09.03.2021 - 21:32
Mynd með færslu
 Mynd: RÚV
Lögregluembætti á Suður-og Vesturlandi hafa haft til rannsóknar brot ungs manns sem er grunaður um að hafa látið drengi senda sér nektarmyndir gegn því að borga fyrir þá viðbætur í tölvuleiki, samkvæmt heimildum fréttastofu

„Ég get staðfest að við höfum haft mál með þessari atvikalýsingu,“ segir Ævar Pálmi Pálmason, yfirmaður kynferðisbrotadeildar hjá lögreglunni á höfuðborgarsvæðinu, í samtali við fréttastofu. 

Hann vildi að öðru leyti ekki tjá sig um málið. 

Samkvæmt heimildum fréttastofu sætti maðurinn, sem er ungur að árum, gæsluvarðhaldi snemma á síðasta ári í tengslum við rannsókn, annað mál tengt honum kom upp í lok síðasta árs og svo aftur á þessu ári.

Fréttastofa hefur ekki upplýsingar um hversu margir drengirnir eru en þeir eru þó nokkrir.

Eftir því sem fréttastofa kemst næst er maðurinn meðal annars grunaður um nettælingu og brot gegn barnaverndarlögum og hafa meint brot hans meðal annars ratað inn á borð lögregluembættisins á Suðurnesjum, Vesturlandi, Vestmannaeyjum og Selfossi. 

 

.

freyrgigja's picture
Freyr Gígja Gunnarsson
Fréttastofa RÚV