Athugið þessi frétt er meira en 1 mánaða gömul.

Stefnir á Ólympíulágmark í sínu fyrsta maraþonhlaupi

Mynd með færslu
 Mynd: Vilhjálmur Þór Guðmundsson - RÚV

Stefnir á Ólympíulágmark í sínu fyrsta maraþonhlaupi

08.03.2021 - 10:31
Hlynur Andrésson mun á sunnudag hlaupa heilt maraþon í fyrsta sinn á ævinni. Þar ætlar hann jafnframt að reyna við lágmarkið til að hljóta keppnisrétt á Ólympíuleikunum í Tókýó í sumar. Hlynur metur möguleikana á að hlaupa undir lágmarkinu góða.

Maraþonið verður hlaupið í Bern, höfuðborg Sviss á sunnudag og var aðeins 50 hlaupurum boðin þátttaka. „Þetta er ekkert sérlega stórt maraþon vegna COVID. En ég ætla allavega að reyna að hlaupa undir tveimur klukkutímum og ellefu og hálfri mínútu. Ég held að ef aðstæður verða góðar að það gæti gengið upp,“ sagði Hlynur þegar RÚV heyrði í honum hljóðið í dag.

Þó Hlynur hafi aldrei hlaupið heilt maraþon áður hefur hann svo sannarlega mikla hlaupareynslu. Hann á Íslandsmetin í 3000 m, 5000 m og 10.000 m hlaupum, í 10 km götu hlaupi og í hálfmaraþoni. Þá á hann einnig Íslandsmetið í 3000 m hindrunarhlaupi auk Íslandsmeta innanhúss. Hlynur hló þó þegar hann var spurður hversu bjartsýnn hann væri á að ná Ólympíulágmarki í sínu fyrsta heila maraþonhlaupi.

Möguleikarnir ættu að vera góðir

„Það er frekar erfitt fyrir mig að segja til um það þar sem ég hef aldrei hlaupið maraþon áður. En miðað við tímann sem ég hljóp hálft maraþon í október og formið sem ég er í núna þá held ég að ég geti hlaupið undir þessu Ólympíulágmarki. En það er samt erfitt fyrir mig að vera með of miklar yfirlýsingar. Ég ætla fyrst og fremst að gera bara mitt besta í þessu hlaupi.“

Aðstæður ættu þó að vera góðar fyrir Hlyn í Bern á sunnudag. „Ég held að það eigi að vera 10 gráðu hiti og nánast enginn vindur. Þannig það yrðu þá bara fullkomnar aðstæður. Vonum bara að spáin haldist þannig,“ sagði Hlynur. Nokkrir svokallaðir hérar verða líka í hlaupinu, til að halda uppi hraða fyrir þá sem ætla sér að hlaupa á 2:11:30 í hlaupinu.

Ætlaði upphaflega að reyna við lágmarkið 2019

Hlynur sem verður 28 ára í sumar ætlaði sér upphaflega að hlaupa heilt maraþon í fyrsta sinn árið 2019 en þau plön breyttust. Þess í stað hefur hann náð upp meiri hraða og bætt hvert Íslandsmetið á fætur öðrum í hinum ýmsu vegalengdum, eins og tíundað er hér að ofan. En af hverju ákvað hann að hlaupa svo heilt maraþon á þessum tímapunkti?

„Ég ákvað eftir HM í hálfu maraþoni í október þegar ég hljóp þá á 1:02:47. Mér fannst það í raun það auðvelt að mér fannst ég þyrfti eiginlega að prófa heilt maraþon. Með Ólympíuleikana í huga þá taldi ég mesta möguleikann fyrir mig að komast inn á þá að gera það í maraþoni. Þannig í samráði við þjálfarann minn eftir hálfa maraþonið í október ákváðum við að kýla á þetta,“ sagði Hlynur sem reynir aðeins við Ólympíulágmarkið í þessu eina hlaupi á sunnudag.

Mun aðeins reyna við Ólympíulágmarkið á sunnudag

„Ég mun ekki hlaupa annað maraþon. Þannig ef þetta tekst ekki hjá mér mun ég taka tímabil á hlaupabraut í maí til júlí. Þó það sé mun erfiðara að komast inn á leikana í þessum hlaupabrautargreinum mun ég samt allavega reyna það þá,“ sagði Hlynur Andrésson við RÚV í dag.

„En ég er bara mjög spenntur að prófa heilt maraþon. Því ef þetta gengur upp og ég næ lágmarkinu og hleyp góðan tíma þá gæti ég átt möguleika á því að skrifa undir einhvern samning við skófyrirtæki fyrir framtíðina,“ sagði Hlynur.