Athugið þessi frétt er meira en 7 mánaða gömul.

Kvikan situr grunnt og gos enn mögulegt

Mynd með færslu
 Mynd: Vilhjálmur Þór Guðmundsson - RÚV
Vísindaráð telur að áfram séu líkur á að eldgos geti orðið á svæðinu á milli Fagradalsfjalls og Keilis. Nýjustu mælingar benda til þess að dregið hafi úr kvikuflæði frá því í seinustu viku. Búast má við svipuðum jarðskjálftahrinum og þeirri sem gekk yfir um helgina.

Vísindaráð almannavarna fundaði í dag til að fara yfir stöðu mál á Reykjanesskaga. Farið var yfir nýjustu gervihnattarmyndir sem bárust í gær og einnig var farið yfir GPS mælingar á jörðu niðri, skjálftagögn og aðrar mælingar. Frá því um helgina hefur heldur dregið úr jarðskjálftavirkni en þá var virknin mikil skammt frá Grindavík. 

„Á laugardagskvöld jókst jarðskjálftavirkni í Fagradalsfjalli umtalsvert og stóð sú aukna virkni yfir frá um kl 18 - 23. Rétt eftir miðnætti, aðfaranótt sunnudags, hófst órói sem stóð yfir í um 20 mínútur og skömmu seinna mældist skjálfti af stærð 3,8. Í framhaldi af því jókst virkni enn frekar og margir kröftugir skjálftar mældust. Sá stærsti mældist kl. 02:02 og var 5,1 að stærð.
Áfram er talið að ef til goss kemur yrði það á sprungu einhvers staðar á því svæði sem afmarkast af Fagradalsfjalli og Keili þar sem kvikugangurinn er að myndast. Engar vísbendingar eru um kvikuhreyfingar fyrir utan þetta svæði. Líklegasti uppkomustaður kviku, miðað við virkni undanfarna daga, er syðst í kvikuganginum. Nýjustu gervihnattarmyndir, GPS mælingar og líkanreikningar benda til þess að dregið hafi úr kvikuflæði frá því í upphafi síðustu viku. Kvikan situr grunnt, nær líklega á um 1km dýpi og áfram þarf að gera ráð fyrir að gos geti brotist út,“ segir í tilkynningu frá Vísindaráði. 

  • Áfram er talið að ef til goss kemur yrði það á sprungu einhvers staðar á því svæði sem afmarkast af Fagradalsfjalli og Keili þar sem kvikugangurinn er að myndast. Engar vísbendingar eru um kvikuhreyfingar fyrir utan þetta svæði.
  • Líklegasti uppkomustaður kviku, miðað við virkni undanfarna daga, er syðst í kvikuganginum.
  • Nýjustu gervihnattamyndir, GPS mælingar og líkanreikningar benda til þess að dregið hafi úr kvikuflæði frá því í upphafi síðustu viku. Kvikan situr grunnt og áfram þarf að gera ráð fyrir að gos geti brotist út.
  • Ef kvikugangurinn heldur áfram að stækka næstu daga og vikur, má eiga von á sambærilegum jarðskjálftahviðum og urðu um helgina.

Kvikuhreyfingar mynda spennu í kringum sig

Kvikuhreyfingar í ganginum á milli Fagradalsfjalls og Keilis veldur spennu í jarðskorpunni á svæðinu í kring. 

„ Líkanreikningar sýna að þessar spennubreytingar koma af stað svokölluðum „gikkskjálftum“ við sinn hvorn enda kvikugangsins. Þessir skjálftar eru merki um spennulosun, en tákna ekki að kvika sé á hreyfingu á þeim svæðum sem þeir mælast. Það er mat vísindaráðs að búast megi við því að virknin á Reykjanesskaga verði kaflaskipt næstu daga. Gera þarf ráð fyrir því að ef kvikugangurinn heldur áfram að myndast næstu daga og vikur þá er von á sambærilegum jarðskjálftahviðum og urðu um helgina,“ segir í tilkynningunni.

Áfram er unnið út frá fjórum sviðsmyndum. Þær eru:

  1. Það dregur úr jarðskjálftavirkni næstu daga eða vikur.

  2. Hrinan mun færast í aukana með stærri skjálftum, allt að 6 að stærð í nágrenni við Fagradalsfjall

  3. Skjálfti af stærða allt að 6.5 verður sem á sér upptök í Brennisteinsfjöllum

  4. Kvikuinnskot haldi áfram í nágrenni við Fagradalsfjall. 

    • Kvikuinnskotsvirkni minnkar og kvika storkna.

    • Leiðir til flæðigoss með hraunflæði sem mun líklega ekki ógna byggð.

Í vísindaráði eiga sæti sérfræðingar frá Veðurstofu Íslands, Háskóla Íslands, ÍSOR, Umhverfisstofnun, Náttúrufræðistofnun Íslands, auk fulltrúa frá Orkuveitu Reykjavíkur, Embætti landlæknis, Isavia-ANS og HS-Orku.