Athugið þessi frétt er meira en 2 mánaða gömul.

Látrabjarg friðlýst

02.03.2021 - 20:32
Látrabjarg var friðlýst í dag. Með því lýkur áralöngu friðlýsingarferli. Látrabjarg er 14 kílómetrar að lengd og 441 metri þar sem það er hæst. Það er eitt stærsta fuglabjarg í Evrópu og þar er mesta sjófuglabyggð landsins. Látrabjarg flokkast sem alþjóðlega mikilvægt fuglasvæði, þar sem meðal annars lundinn á sér heimili og helmingur íslenska álkustofnsins.

Stefnt hefur verið að friðun þessa vestasta odda Íslands í þónokkurn tíma, en markviss vinna hefur staðið yfir í samstarfi stjórnvalda og landeigenda síðasta áratuginn. 

Guðmundur Ingi Guðbrandsson, umhverfis- og auðlindaráðherra, segir friðunina verða til þess að nú sé hægt að efla innviði.

„Til þess að taka betur á móti ferðamönnum og stýra umferðinni á einn stað frekar en annan þannig að það megi ná samhæfingu á milli þeirra sem búa í bjarginu, fuglanna, og ferðamannanna.“ 

Friðlýsingin tekur mið af því að enn verði hægt að stunda þar hefðbundnar nytjar, sem tíðkast hafa allt frá landnámi, svo sem eggjatöku.

„Við leggjum áfram áherslu á það að það sé innan sjálfbærnimarka. Þannig að þar gilda þá þau lög sem um það fjalla.“ 

Friðunin á ekki einungis að hjálpa til við að stýra ferðamönnum á landi, heldur einnig á hafi, þar sem hún nær líka út á sjó.

„Þannig megi horfa til þess að til langrar framtíðar séum við að taka utan um þetta svæði ásamt landeigendum sem þarna hafa líka unnið gott starf á undanförnum árum.“

Á næstunni fer frekari innviðauppbygging af stað, en ráðherra væntir þess að tillögur verði settar fram í nú í ljósi friðunarinnar.