Athugið þessi frétt er meira en 2 mánaða gömul.

Marsrallið hafið hjá Hafrannsóknastofnun

Mynd með færslu
 Mynd: Svanhildur Egilsdóttir/hafogvat
Stofnmæling botnfiska á Íslandsmiðum hófst í dag og stendur yfir næstu þrjár vikurnar. Verkefnið er einnig kallað marsrall eða togararall, en þessar rannsóknir hafa verið gerðar á sama hátt á hverju ári síðan 1985.

Fjögur skip taka þátt í verkefninu; togararnir Breki VE og Gullver NS ásamt rannsóknaskipunum Árna Friðrikssyni og Bjarna Sæmundssyni. Togað verður á tæplega 600 stöðvum á 20-500 metra dýpi umhverfis landið.

Á vef Hafrannsóknastofnunar kemur fram að helsta markmið þessarra rannsókna sé að fylgjast með breytingum á stofnstærð, aldri, fæðu, ástandi og útbreiðslu botnfisktegunda við landið. Einnig verði safnað sýnum vegna annarra rannsókna, t.d. á mengunarefnum í sjávarfangi og mat lagt á hve mikið er af ýmisskonar rusli á sjávarbotni.

Í marsralli 2019 hóf Hafrannsóknastofnun aftur merkingar á þorski eftir nokkurt hlé. Í ár er stefnt að merkingum á þorski á Vestfjarðamiðum og úti fyrir Norðurlandi.

Hér má sjá ferðir skipanna og togstöðvar í marsrallinu.