Golfheimurinn í áfalli eftir bílslys Tiger Woods

epaselect epa09032688 A Genesis GV80 SUV driven by US golfer Tiger Woods of the US is seen at the scene of a single-vehicle crash in Rancho Palos Verdes, California, USA, 23 February 2021. According to a statement released by the LA County Sheriff, Tiger Woods was extricated from his vehicle and taken to the hospital.  EPA-EFE/ETIENNE LAURENT
 Mynd: EPA-EFE - EPA

Golfheimurinn í áfalli eftir bílslys Tiger Woods

24.02.2021 - 00:12
Golfheimurinn er í áfalli eftir að fréttir bárust af því að bandaríski kylfingurinn Tiger Woods væri talsvert slasaður eftir bílveltu í Los Angeles í morgun. Klippa þurfti bílinn til að ná Woods út og hann gekkst undir aðgerð, meðal annars vegna áverka á fæti. „Mér er líður mjög illa. Ég vona að það verði í lagi með hann,“ sagði Justin Thomas, sem er í þriðja sæti á styrkleikalista PGA-mótaraðarinnar og einn nánasti vinur Woods á golfvellinum.

Woods var að jafna sig eftir sína fimmtu aðgerð á baki þegar hann lenti í slysinu í morgun. Hann hafði gert sér vonir um að spila á Masters-mótinu í apríl. 

„Þetta gæti haft mjög alvarlegar afleiðingar fyrir feril hans,“ hefur BBC eftir golf-sérfræðingi sínum, Iain Carter. „Hann var í sjónvarpinu á sunnudag og þá höfðu margir orð á því hversu varfærinn hann var í yfirlýsingum sínum um hvort hann yrði kominn í form fyrir Masters. Nú hefur enginn áhyggjur af því lengur.“

Woods er einn fremsti íþróttamaður sögunnar og er talinn hafa breytt golfíþróttinni með kraftmikilli sveiflu sinni, áræðni og líkamlegu atgervi. 

Árið 2009 urðu kaflaskil í lífi hans þegar hann keyrði á  brunahana fyrir utan heimili sitt.  Fréttir bárust af því að hann hefði yfirgefið hús sitt í skyndi eftir að þáverandi eiginkona hans hafði komist að stanslausu kvennafari og framhjáhaldi og elt hann á röndum með golfkylfu.

ímynd hans hrundi, hann missti styrktaraðila en líka virðingu golfheimsins. Hann tók sér frí frá golfi í framhaldinu en sneri fljótlega aftur þótt öllum væri ljóst að þar færi ekki sami Tiger Woods og áður hafði ráðið ríkjum.

Eftir fimm sigra á PGA-mótaröðinni 2013 fór aftur að síga á ógæfuhliðina þegar bakmeiðsli urðu þess valdandi að hann gat aðeins tekið þátt í 24 mótum næstu fjögur árin. Hann var handtekinn fyrir akstur undir áhrifum sterkra verkjalyfja 2017 en áttu svo magnaða endurkomu á Masters-mótinu 2019 þar sem hann vann loks stórmót eftir 11 ára hlé.

Á vef Guardian er haft eftir umboðsmanni Woods að kylfingurinn hafi gengist undir aðgerð en engar frekari upplýsingar fengust um líðan hans.  Fram kom á blaðamannafundi lögreglunnar í kvöld að kylfingurinn hefði verið með meðvitund og sýnt viðbrögð þegar honum var bjargað úr bíl sínum en ástand hans hefði verið alvarlegt.  Washington Post hefur eftir slökkviliðsstjóra að meiðsl Woods hafi ekki verið lífshættuleg 

Tengdar fréttir

Golf

Tiger Woods í aðgerð eftir bílslys