200 áhorfendur mega mæta á íþróttakappleiki

Mynd með færslu
 Mynd: Tomasz Kolodziejski - RÚV

200 áhorfendur mega mæta á íþróttakappleiki

23.02.2021 - 11:44
200 manns mega mæta á íþróttaviðburði frá og með morgundeginum að uppfylltum ákveðnum skilyrðum. Svandís Svavarsdóttir, heilbrigðisráðherra, kynnti nýja reglugerð byggða á tillögum sóttvarnarlæknis í morgun. Algjört áhorfendabann hefur verið á kappleikjum frá því í október.

Íþróttafélög þurfa að tryggja eins metra fjarlægð á milli óskyldra aðila og þá þarf að selja í númeruð sæti. Áhorfendur þurfa einnig að bera grímu.

Ljóst er að íþróttafélög og stuðningsfólk taka þessum fréttum fagnandi. Ef ekki er hægt að uppfylla skilyrðin sem talin eru upp hér að ofan gildir 50 manna fjöldatakmörkun.