Athugið þessi frétt er meira en 3 mánaða gömul.

Erlend félög nýta meirihluta flugtíma í flughermum hér

22.02.2021 - 22:47
Mynd: RÚV / RÚV
Erlend flugfélög nýta meira en helming tímans í flughermum Icelandair eins og staðan er nú. Dæmi eru um að flugfélög fljúgi sínu fólki hingað sjálf til að einfalda sóttkvíarmál.

Icelandair, ólíkt mörgum öðrum flugfélögum, rekur sína eigin þjálfunaraðstöðu með flughermum fyrir þær flugvélategundir sem félagið notar og í venjulegu árferði eru hermarnir í stöðugri notkun, annars vegar af Icelandair og hins vegar af ýmsum erlendum flugfélögum.

„Það er ekkert normalt við 2020, en í normal árferði eru það um 30% af notkun flughermanna sem eru erlendir aðilar, segir Haukur Reynisson, flugrekstrarstjóri Icelandair.“
Og þeir þá í notkun meira og minna allan sólarhringinn?
„Já, þeir eru í notkun alveg upp undir 18 klukkustundir á sólarhring.“

Eins og gefur að skilja er ástandið öðruvísi núna þegar ferðamennska og flug liggur að miklu leyti niðri í heiminum. Flugmálayfirvöld víða hafa veitt heimild til að lengra líði á milli þjálfunar flugmanna í flughermum í ljósi stöðunnar. Engu að síður er staðan sú að um 60% tímans í flughermum Icelandair er nýttur af erlendum flugfélögum. Vegna reglna um sóttkví á landamærum hafa sum flugfélög gripið til þess ráðs að senda flugmenn hingað í vélum á eigin vegum, þannig að þeir fara þá í vinnusóttkví hér. Flug í hermum er nánast eins og að fljúga í raunveruleikanum segja þeir sem til þekkja.

„Ég myndi segja það,“ segir Kári Kárason þjálfunarflugstjóri. „Nú er ég búinn að vinna í flughermum í fimmtán ár og þetta er ansi nálægt því að vera raunveruleikinn. Það er helst á jörðinni sem þetta er örlítið öðruvísi en þegar maður er komin í loftið og farinn að berjast við þessar bilanir sem við erum að æfa okkur í þá er þetta nákvæmlega eins og flugvélin.“

Í raun má segja að nýtingin á flughermunum, bæði af flugmönnum Icelandair og frá erlendum félögum verði ein fyrsta vísbendingin um að ferðaþjónusta sé að taka við sér í heiminum á ný, því áður en það gerist þarf að þjálfa fólkið.