Mynd: EPA-EFE - EFE
Athugið þessi frétt er meira en 2 mánaða gömul.
Mótmæli í Barselóna, sjötta kvöldið í röð
Sjötta daginn í röð flykktust mótmælendur út á götur Barselónaborgar til að segja álit sitt á fangelsun rapparans Pablos Haséls, sem dæmdur var og fangelsaður fyrir óvirðingu við konungsfjölskylduna og það sem dómurinn segir vera „upphafningu hryðjuverka" í textum hans og færslum á Twitter. Líkt og fimm undanfarin kvöld tók að hitna í kolunum þegar kvölda tók, en þó ekki jafn mikið og áður, enda farið að fækka nokkuð í hópi mótmælenda.
Nokkrir grímuklæddir mótmælendur köstuðu flöskum, hvellsprengjum og öðru lauslegu að lögreglumönnum sem stóðu vörð um höfuðstöðvar lögreglunnar í borginni, en þar kom ekki til átaka mótmælenda og lögreglu sem orð er á gerandi. Á göngu sinni frá aðallestarstöð borgarinnar kröfðust nokkur hundruð manns frelsis fyrir Pablo Hasél og nokkrir úr þeirra hópi hrófluðu upp götuvígjum á Römblunni, helstu breiðgötu borgarinnar, grýttu lögreglu og brutu rúður í nærliggjandi verslunum.
Um 100 manns hafa verið handtekin í mótmælum í Barselóna og víðar eftir að Hasél var fluttur í varðhald á þriðjudag, þar af fimm í kvöld. Hæstiréttur staðfesti nýverið níu mánaða fangelsisdóm yfir þessum orðhvata, 32 ára rappara. Mótmælendur, stór hópur úr fremstu röð spænskra listamanna og mannréttindasamtökin Amnesty International krefjast frelsunar Haséls og segja dóminn alvarlega aðför að tjáningarfrelsi á Spáni.
