Bólusetningardagatalið liggur fyrir

Heilbrigðisráðuneytið hefur, í samvinnu við sóttvarnalækni, útbúið bólusetningardagatal vegna COVID-19, miðað við fyrirliggjandi upplýsingar og áætlanir um afhendingu bóluefna.Því er ætlað að gefa fólki vísbendingu um hvenær líklegt er að bólusetning hefjist í einstökum forgangshópum. Dagatalið verður uppfært eftir því sem nýjar upplýsingar berast.

Dagatalið er birt með fyrirvara, enda að hluta til um áætlun að ræða sem mun taka breytingum. Gangi forsendur eftir lýkur bólusetningu gegn COVID-19 hér á landi fyrir lok júní næstkomandi, samkvæmt upplýsingum frá ráðuneytinu.

 

Þrjú bóluefni eru með markaðsleyfi og eru komin í notkun hér á landi; bóluefni Pfizer, AstraZeneca og Moderna. Fyrir liggur staðfest áætlun um afhendingu þessara lyfja til loka mars. Þá liggur einnig fyrir að þessir framleiðendur áforma að hafa fyrir lok júní afhent bóluefni fyrir samtals 190.000 manns.

Að auki hefur Ísland, á grundvelli Evrópusamstarfs, gert samninga um kaup á bóluefnum Curavac og Janssen. Þá er Evrópusambandið að ljúka samningi um bóluefni Novavax sem Ísland fær hlutdeild í. Öll þessi lyf eru komin í áfangamat hjá Evrópsku lyfjastofnuninni og þess er vænst að þau fái markaðsleyfi innan tíðar.

Í samningum um þessi bóluefni kemur fram hve mikið þau áætla að geta afhent á öðrum ársfjórðungi, þ.e. fyrir lok júní. Bólusetningardagatalið tekur mið af þessum upplýsingum en gögn hvað þetta varðar eru birt með fyrirvara um að markaðsleyfi liggja ekki fyrir og staðfestar afhendingaráætlanir ekki heldur.