Athugið þessi frétt er meira en 5 mánaða gömul.

Forstjóri Alþjóðaviðskiptastofnunarinnar, fyrst kvenna

epa08547705 Ngozi Okonjo-Iweala, from Nigeria, candidate as Director General of the World Trade Organization (WTO), attends the press conferences of candidates for the WTO Director-General selection process, at the headquarters of the World Trade Organization (WTO), in Geneva, Switzerland, 15 July 2020.  EPA-EFE/MARTIAL TREZZINI
 Mynd: epa
Bandaríkjastjórn lýsti í kvöld „eindregnum stuðningi“ við skipun hinnar nígerísku Ngozi Okonjo-Iweala í forstjórastól Alþjóðaviðskiptastofnunarinnar. Stuðningsyfirlýsingin markar enn eina kúvendinguna í stefnu Bandaríkjastjórnar á sviði alþjóðamála, eftir að Joe Biden tók við forsetaembættinu af Donald Trump.

Hæfnisnefnd Alþjóðaviðskiptastofnunarinnar mælti með því í október, að Okonjo-Iweala yrði valin úr hópi þeirra sem tilnefnd voru til að taka við af núverandi forstjóra, Roberto Azevedo. Talsmaður nefndarinnar sagði þá, að fulltrúar 163 af 164 aðildarríkjum hefðu samþykkt skipun hennar. Þessi eini reyndist fulltrúi Bandaríkjastjórnar. Bandaríkjastjórn vildi skipa aðra konu í stöðuna, Yoo Myung-hee, fjármálaráðherra Suður-Kóreu.

Fyrsta konan og fyrsti Afríkubúinn

Trump var mjög uppsigað við Alþjóðaviðskiptastofnunina og sagði hana „hræðilega“ stofnun sem hyglaði Kínverjum á kostnað Bandaríkjanna. Yoo hefur nú dregið framboð sitt til baka og sagði þá ákvörðun tekna „í nánu samráði“ við Bandaríkjastjórn. Því er nú ekkert í veginum fyrir skipun Okonjo-Iweala, sem þar með verður fyrsta konan og fyrsti Afríkubúinn til að gegna þessari áhrifastöðu. 

Ævar Örn Jósepsson
Fréttastofa RÚV