Mynd: Kristinn Gauti Gunnarsson - RÚV
Athugið þessi frétt er meira en 1 mánaða gömul.
Ók á móti umferð, yfir á rauðu og endaði á vegriði
Lögreglan á höfuðborgarsvæðinu hafði í gærkvöldi afskipti af ökumanni sem sinnti ekki merkjum um að stöðva ökuferðina. Maðurinn ók gegn einstefnu og fór yfir á rauðu ljósi. Ferðin endaði með því að ökumaðurinn keyrði ítrekar utan í vegrið, samkvæmt því sem segir í dagbók lögreglunnar.
Hann er grunaður um akstur undir áhrifum fíkniefna og áfengis og var fluttur í fangaklefa.
Fljótlega eftir miðnættið hafði lögregla afskipti af ungum manni í annarlegu ástandi í hverfi 108. Hann hafði sparkað upp hurð fjölbýlishúss og skemmt hana.
Þá var lögregla kölluð til í Kópavogi í gærkvöld þar sem kona reyndi að taka út lyfseðilsskyld lyf í apóteki fyrir aðra manneskju. Sá kannaðist ekkert við konuna og var hún vistuð í fangaklefa vegna rannsóknar málsins. Hún er einnig grunuð um akstur undir áhrifum.
Seinni partinn í gær barst lögreglu tilkynning um að ekið hefði verið á unglingsstúlku sem var nýkomin út úr strætisvagni. Hún kenndi sér eymsla í fæti og var flutt á slysadeild til aðhlynningar.
