Tjón eftir snjóflóð og vélar í mokstri en borgin auð

27.01.2021 - 22:04

Mynd: Veðurstofa Íslands

Það er mikill snjór á stórum hluta landsins. Raunar virðist suðvesturhornið og suðurlandslengjan vera einu landshlutarnir sem eru nánast auðir. Töluvert tjón varð ofan Eskifjarðar í vikunni og verið er að notast við vinnuvélar til að forða öðru eins á Hofsósi. Gervitunglamynd Veðurstofunnar hér að ofan, tekin þriðjudaginn 26. janúar, sýnir glögglega að snjóleysi er vandfundið á landinu þessa dagana.

Nú á miðvikudagskvöld hófust vinnuvélar handa við að moka burt snjóhengjuna ofan við Vesturfarasetrið á Hofsósi. Valgeir Þorvaldsson, forstöðumaður setursins, sagði starfsemi fyritækja sinna í mikilli hættu ef snjóhengjan skríður fram. Lögreglan lokaði svæðinu.

Stórar vinnuvélar moka burt hengjuna

Mynd: RÚV / RÚV

Nú er smám saman verið að moka niður hengjuna yfir Vesturfarasetrinu á Hofsósi, með snjótroðara og gröfum (Myndskeið: Sigfús Ingi Sigfússon)

Snjóflóð lagði Drekahúsin

Félagsmenn í skotíþróttafélaginu Drekanum á Eskifirði sáu í dag það tjón sem varð á svæðinu þeirra eftir að snjóflóð féll þar í vikunni. Flóðið var um kílómeter á breidd og skemmdirnar eru miklar eins og þessar myndir sýna.

Mynd: Sævar Guðjónsson - Aðsend mynd

Hús Drekans virðast vera ónýt af völdum snjóflóðsins (Myndir: Sævar Guðjónsson)

Snjólaust fyrir sunnan

En það er ekki allt á kafi allsstaðar. Til dæmis ekki í Reykjavík og Borgarnesi eins og þessar myndir sýna sem voru teknar í dag.

Mynd: RÚV

Norðurlandið á kafi

Þessar myndir eru frá Siglufirði, Grenivík, Ólafsfirði, Jökulsá á Fjöllum, Dalvík og Akureyri - teknar af fréttamönnum RÚV á Norðurlandi, þeim Ágústi Ólafssyni og Óðni Svan Óðinssyni.