Athugið þessi frétt er meira en 5 mánaða gömul.

Óvenju mörg snjóflóð síðustu daga

27.01.2021 - 01:06
Mynd með færslu
 Mynd: Sigurður Þór Helgason Matric3 - RÚV
Óvenju mörg snjóflóð hafa fallið í hrinum á norðanverðum Vestfjörðum, Norðurlandi og Austfjörðum síðustu daga. Ofanflóðavakt Veðurstofunnar hafa borist 122 tilkynningar undanfarna tíu daga. Á vef Veðurstofunnar segir að flóðin séu mun fleiri en hafa verið skráð, þar sem mörg flóð falla utan alfaraleiðar, önnur fennir yfir án þess að þau sjáist og ekki eru öll flóð tilkynnt til Veðurstofu.

Sum flóðanna eru óvenjuleg að sögn Hörpu Grímsdóttur, hópstjóra ofanflóðavöktunar á Veðurstofu Íslands. Ekki sé algengt að snjóflóð falli yfir þjóðveginn á Öxnadalsheiði, þó það sé ekki óþekkt. Snjóflóð hafi fallið á fimm stöðum á heiðinni í þessari snjóflóðahrinu. Einnig segir hún það óvenjulegt að svo öflugar hrinur séu í gangi í svona mörgum landshlutum á sama tíma.

Nokkur flóðanna hafa valdið talsverðu tjóni. Skíðaskálinn í Skarðsdal á Siglufirði er ónýtur eftir snjóflóð sem féll 20. janúar. Flóðið hreif einnig með sér gáma með skíðabúnaði og ýtti þeim á nýjan troðara. Tjón varð á skotæfingasvæði við Eskifjörð 25. janúar vegna snjóflóðs sem féll úr Hólmgerðarfjalli inn af Oddsskarði. Innarlega í Fnjóskadal féll stórt flóð sem braut mikið af skógi. Þá segir á vef Veðurstofunnar að mælabúnaður hennar hafi orðið fyrir tjóni í snjóflóðum á tveimur stöðum, svo vitað sé.

Snjóalög eru óstöðug og hafa sum flóðanna fallið í skaplegu veðri. Harpa segir að talsverð hætta sé á því að fólk sem er á ferð í brattlendi til fjalla geti sett af stað flóð. „Vélsleðafólk, skíðamenn og aðrir sem stunda útivist í fjalllendi að vetrarlagi ættu að forðast það að vera í eða undir bröttum hlíðum þar sem snjór hefur safnast undanfarna daga," er haft eftir Hörpu á vef Veðurstofunnar.