Kínverskar Chengdu J-10 orrustuþotur á flugsýningu. Mynd: epa
Athugið þessi frétt er meira en 1 mánaða gömul.
Fjölmargar kínverskar herþotur í taívanskri lofthelgi
Varnarmálaráðuneyti Taívans segir kínverska flugherinn hafa sent stórar sveitir herþotna langt inn í taívanska lofthelgi tvo daga í röð. Í yfirlýsingu ráðuneytisins er fullyrt að átta kínverskar sprengjuþotur sem hannaðar eru til að bera kjarnavopn, fjórar orrustuþotur og ein kafbátaleitarvél hafi flogið inn í lofthelgina á laugardag. Á sunnudag voru það svo tólf kínverskar orrustuþotur, tvær kafbátaleitarvélar og ein njósnavél sem rufu lofthelgina.
Kínverjar líta á Taívan sem hluta af Kína, en Taívanar segjast sjálfstæð þjóð. Stjórnmálaskýrendur telja að Kínverjar séu með þessu að sýna mátt sinn og megin og kanna um leið viðbrögð nýkjörins Bandaríkjaforseta. Stjórnvöld í Washington hafa þegar komið óánægju sinni með þetta framferði kínverska flughersins á framfæri við yfirvöld í Peking og Joe Biden lýst „óbilandi stuðningi“ Bandaríkjanna við Taívan.
