Athugið þessi frétt er meira en 1 mánaða gömul.

Egyptar hefja fjöldabólusetningu í dag

24.01.2021 - 04:08
epa08948375 Medical worker wearing protective equipment prepares a dose of Sinopharm's China National Biotec Group COVID-19 vaccine during the vaccination at Belgrade Fair makeshift vaccination center in Belgrade, Serbia, 19 January 2021. Serbia began its mass vaccination against COVID-19 with elderly people and medical workers then moving on to members of the military and the police.  EPA-EFE/ANDREJ CUKIC
 Mynd: EPA-EFE - EPA
Abdel Fattah al-Sisi, forseti Egyptalands, tilkynnti í gær að fjöldabólusetning gegn COVID-19 myndi hefjast í landinu í dag, sunnudag. Bóluefnið sem notað verður er frá kínverska lyfjaframleiðandanum Sinopharm.

„Við hefjum bólusetningarherferð á morgun; heilbrigðisstarfsfólk verður bólusett fyrst, langveikt fólk næst og aldraðir í framhaldinu,“ sagði al-Sisi á stuttum fréttamannafundi í Port Said á laugardag. Fyrsta sendingin af Sinopharm-bóluefninu barst til Egyptalands í desember.

Framleiðendur segja það virka í 79 prósentum tilfella, sem er töluvert meira en bóluefnið frá AstraZeneca (70,4 prósent) en talsvert minna en bóluefnin frá Pfizer-BioNTech og Moderna (um 95 prósent).

Von á 40 milljónum bóluefnaskammta á næstunni

Hala Zayed, heilbrigðisráðherra Egyptalands, tilkynnti fyrr í mánuðinum að Egyptar ættu von á 40 milljónum skammta af bóluefni, mestmegnis frá AstraZeneca, í gegnum alþjóðlega Gavi/COVAX-bóluefnasamstarfið. Með þeim er ætlunin að bólusetja um 20 prósent egypsku þjóðarinnar.

Ríflega 160.000 manns hafa greinst með COVID-19 í Egyptalandi og um 8.850 dáið úr sjúkdómnum en Egyptar eru um 100 milljónir að tölu. Í frétt AFP segir að smitsjúkdómasérfræðingar og heilbrigðisstarfsfólk telji að allt að tíu sinnum fleiri hafi smitast í landinu en þau hafi einfaldlega ekki fundist vegna gloppóttrar skimunar.