Athugið þessi frétt er meira en 1 mánaða gömul.

de Sousa endurkjörinn með miklum meirihluta atkvæða

24.01.2021 - 23:20
epa08962184 Portuguese President and presidential candidate Marcelo Rebelo de Sousa talks to the journalists after casting his vote in Celorico de Basto, northern Portugal, 24 January 2021. According to reports, COVID-19 fatalities in Portugal, which now stand over 10,000, could play a major role in low voter turnout in the 2021 presidential elections. Portugal is currently under a second national lockdown, to quell the widespread of COVID-19.  EPA-EFE/HUGO DELGADO
 Mynd: EPA-EFE - LUSA
Marcelo Rebelo de Sousa, forseti Portúgals, var endurkjörinn í dag með yfirgnæfandi meirihluta atkvæða. Þegar búið var að telja 98 prósent atkvæða hafði de Sousa, sem er frjálslyndur miðjumaður úr flokki Sósíaldemókrata, fengið 61,6 prósent þeirra. Þar sem hann hlaut hreinan meirihluta atkvæða þarf ekki að kjósa á milli tveggja efstu. Sósíalistinn Ana Gomes var í öðru sæti með 12,2 prósent og þjóðernissinninn Andre Ventura í því þriðja, með 11,9 prósent.

Lítil kjörsókn í skugga farsóttar

Kjörsókn var með minnsta móti vegna kórónaveirufaraldursins en þó heldur meiri en óttast var. Fyrstu fréttir benda til þess að hún hafi verið á bilinu 45 - 50 prósent, en áhyggjur voru uppi um að hún yrði jafnvel undir 30 prósentum.

Kórónaveirusmitum hefur fjölgað mjög í Portúgal að undanförnu og kosningadagurinn var sjöundi dagurinn í röð, þar sem metfjöldi fólks hefur dáið af völdum COVID-19 þar í landi, eða 275. Þá hafa aldrei jafn margir COVID-19 sjúklingar legið á sjúkrahúsum Portúgals og nú. 

Vinsæll forseti

de Sousa, sem sjálfur greindist með COVID-19 fyrr í þessum mánuði, er 72 ára gamall og var fyrst kjörinn forseti 2016. Hann hefur notið mikilla vinsælda, raunar svo mikilla að Sósíalistaflokkurinn sendi engan fulltrúa í framboð og lýsti ekki yfir stuðningi við sósíalistann Gomes, enda hefur forsetinn stutt minnihlutastjórn flokksins síðustu ár.

Portúgalsforseti er kosinn til fimm ára í senn og má lengst sitja í tvö kjörtímabil. Völd hans eru takmörkuð, líkt og völd forseta Íslands. Hann hefur þó heimild til að rjúfa þing og boða til kosninga, auk þess sem hann er æðsti yfirmaður hersins, að nafninu til. 

Ævar Örn Jósepsson
Fréttastofa RÚV