Athugið þessi frétt er meira en 1 mánaða gömul.

Báðir foreldrar mega mæta í ungbarnavernd

Mynd með færslu
 Mynd: Vilhjálmur Þór Guðmundsson - RÚV
Frá og með morgundeginum mega báðir foreldrar mæta í mæðravernd og ung- og smábarnavernd á Heilsugæslu höfuðborgarsvæðisins. Í sóttvarnaskyni hefur aðeins annað foreldrið mátt mæta frá því í vor. Ragnheiður Ósk Erlendsdóttir, framkvæmdastjóri hjúkrunar á heilsugæslunni, segir að það hafi verði mikil eftirspurn eftir breytingunni.

„Þetta hefur verið þannig frá því síðastliðið vor að bara móðirin hefur mátt mæta í mæðraverndina og bara annað foreldrið í ung- og smábarnaverndina. En núna, sökum þess að það er mjög lítið um smit í samfélaginu, þá höfum við ákveðið á opna þetta aftur,“ segir Ragnheiður Ósk.

Hún segir að þetta sé mikill léttir fyrir fólk. „Jú, þetta er mikill léttir og mikil eftirspurn eftir þessu. Auðvitað vilja báðir foreldrar fylgja, bæði í mæðraverndina og í ung- og smábarnaverndina,“ segir hún.

Heilsugæslan minnir á að þrátt fyrir þessar tilslakanir verði allir sem koma á heilsugæslustöðvar að passa áfram upp á smitvarnir og taka tillit til annarra. Verðandi foreldrar og foreldrar sem eru veikir mega alls ekki koma í mæðravernd eða ung- og smábarnavernd.