Athugið þessi frétt er meira en 8 mánaða gömul.

Hálf milljón raddsýna á fimm dögum

23.01.2021 - 12:29
Mynd með færslu
 Mynd: Kristinn Þeyr Magnússon - RÚV
Börn og ungmenni í grunnskólum landsins hafa heldur betur lagt sitt af mörkum í að safna raddsýnum í raddsýnagagnagrunninn Samróm. Á tæpri viku hefur fjöldi sýna farið úr um 320.000 sýnum í um 847.000 sýni. Sýnunum hefur fjölgað um hálfa milljón á fimm dögum.

 

Lestrarkeppni grunnskólanna 2021 var af stað á mánudaginn í Fellaskóla, af Guðna Th. Jóhannessyni,forseta Íslands og Elizu Reid ,forsetafrú. Þegar keppnin hófst höfðu safnast 320.000 setningar frá því söfnunin hófst 16. október árið 2019. Í dag eru setningarnar orðnar 846.793. 

Rúmlega sautján þúsund einstaklingar hafa lesið inn rúmlega 73 þúsund mínútur frá því að söfnun hófst. Áhersla er lögð á að safna röddum barna og ungmenna, enda hafa þær annað tíðnisvið en raddir fullorðinna. Þá er einnig lögð áhersla á að safna röddum fólks erlendum uppruna. Keppnin stendur til mánudagsins 25 janúar.

 

Söfnun raddsýna fer fram á vefsvæðinu samrómur.is, sem Almannarómur og Háskólinn í Reykjavík standa að í sameiningu. Raddgagnasafnið Samrómur verður notað til þjálfunar máltæknihugbúnaðar fyrir íslensku.

Þeir sem vilja fræðast nánar um Samróm geta gert það hér.