Athugið þessi frétt er meira en 1 mánaða gömul.

Guðmundur Felix farinn að geta hreyft upphandleggi

Mynd: Sylwía Grétarsson / RÚV
Guðmundur Felix Grétarsson sem fékk grædda á sig handleggi og axlir fyrir rúmri viku er farinn að geta hreyft upphandleggina dálítið. Hann segir að fyrst þegar hann hafi vaknað eftir aðgerðina hafi honum fundist eins og hann væri kominn með dúkkuhandleggi. Hann sé nú farinn að venjast þeim. Honum finnist þeir líkir sínum gömlu handleggjum sem hann missti í vinnuslysi fyrir 23 árum.

Guðmundur Felix svaraði spurningum íslenskra blaða- og fréttamanna á Zoom-fundi fyrr í dag. „Það eru þrjú ár þangaði til við vitum árangurinn af þessari aðgerð,“ segir Guðmundur. Eftir ár geti hann vænst þess að vera kominn með hreyfigetu í olnbogann.

Hann segir að draugaverkir sem hann hafi haft í höndum og fingrum frá því hann missti handleggina hafi magnast eftir handleggja- og axlaágræðsluna. Hann hafi fundið sterkt fyrir fingrunum 2-3 dögum eftir aðgerðina. Læknarnir viti ekki hversu raunveruleg tilfinning er.

Minna hann á gömlu handleggina 

Fyrst eftir að Guðmundur vaknaði eftir aðgerðina var hann ekkert alltof hrifinn af handleggjunum og fannst þeir eins og dúkkuhendur. „Svo sá maður hár á þeim sem maður kannaðist ekki við,“ segir Guðmundur. Um leið og hann fór aðeins að geta hreyft hendurnar breyttist þetta. „Og það furðulega er að mér finnst þær svolítið líkar gömlu höndunum mínum,“ segir Guðmundur. Hann hefur snert á sér kinnarnar og bringuna. „Ég á eftir að verða góður vinur þeirra og hugsa vel um þær. Mér líður vel með þær,“ segir Guðmundur.