Athugið þessi frétt er meira en 1 mánaða gömul.

„Ekkert gruggugt í gangi“

Mynd: Guðmundur Bergkvist / RÚV

„Ekkert gruggugt í gangi“

19.01.2021 - 16:07

Þorkell Gunnar Sigurbjörnsson

íþróttafréttamaður

Aron Pálmarsson hefur haldið sig utan sviðsljóssins eftir að í ljós kom að hann gæti ekki tekið þátt á heimsmeistaramótinu í handbolta í Egyptalandi vegna meiðsla. Í gær birtist hins vegar viðtal við Tomas Svensson markmannsþjálfara Íslands á vefsíðu sænska dagblaðsins Aftonbladet. Þar sagði Svensson að læknir íslenska liðsins hefðu ekki einu sinni fengið að skoða Aron áður en ákveðið var að Aron yrði ekki með á HM.

Þessi orð stönguðust á við fréttatilkynningu HSÍ frá 2. janúar. Þar sagði meðal annars: „Eftir læknisskoðun hjá læknum landsliðsins er það ljóst að Aron verður ekki leikfær nú í janúar.“ HSÍ sendi svo frá sér aðra tilkynningu í gær þar sem ítrekað var að Aron hefði sannarlega verið skoðaður af íslenskum. Ummæli Svensson væru byggð á misskilningi og hefði hann beðist afsökunar.

„Þetta var náttúrulega mjög skrítið verð ég að segja að vakna við þetta í gær. Hann [Tomas Svensson] hringdi náttúrulega í mig um leið og baðst afsökunar. En ég auðvitað gekk á hann og spurði hann hvað honum gengi til. Í rauninni er það sem kemur út úr þessu að það var bara samskiptaleysi hjá þeim, þjálfurunum og innan HSÍ. Það er í rauninni ekkert gruggugt í gangi,“ sagði Aron Pálmarsson þegar hann ræddi við RÚV í dag.

„Það er enginn misskilningur í gangi“

Brynjólfur Jónsson læknir sem hefur starfað með HSÍ í mörg ár skoðaði Aron og kvað upp dóminn. „Binni læknir er búinn að vera inn í þessu síðan þetta gerðist. Hann er búinn að vera í samskiptum við læknana úti [hjá Barcelona], við mig. Svo flýg ég heim daginn eftir úrslitaleik Meistaradeildarinnar og hitti Binna síðan daginn eftir það. Þetta mál er í rauninni bara í meira lagi óheppilegt og skrítið. Það er enginn misskilningur í gangi. Þetta er í rauninni bara samskiptaleysi,“ sagði Aron.

Mynd: Mummi Lú - RÚV

Aron í leik Íslands og Litáen í Laugardalshöll í nóvember.

Aron var einn leikmanna sem var talsmaður þess að endurskoðað yrði að halda HM 2021 í miðjum heimsfaraldri kórónuveirunnar. Í kjölfari frétta í gær hafa því spunnist sögur um það að Aron hafi hreinlega bara ekki nennt á HM í Egyptalandi. Hann segir það þó af og frá.

„Svo fylltist mælirinn“

„Það er mjög erfitt að sitja undir slíku. Maður er fyrirliði og prímus mótór í þessu liði, þannig það er alltaf smjattað á öllu og maður er orðinn vanur því. En það er náttúrulega nógu erfitt að sitja heima og þurfa að horfa á þetta í staðinn fyrir að vera að spila. Og erfitt að vera í þessum meiðslum. Sérstaklega svona meiðslum, sem eru alvarleg. Þannig auðvitað er það leiðinlegt. Ég reyni nú lítið að pæla í því en svo fyllist mælirinn og maður þarf að láta í sér heyra, og bara í rauninni taka burt allan misskilning og segja þetta bara eins og það er,“ sagði Aron.

epa08120508 Iceland's Aron Palmarsson in action against Denmark's Magnus Saugstrup Jensen (R) during the Men's EHF EURO 2020 Handball preliminary round match between Denmark and Iceland in Malmo, Sweden, 11 January 2020. EPA-EFE/ANDREAS HILLERGREN SWEDEN OUT

Mynd: EPA

Aron átti sannkallaðan stórleik á móti Danmörku á EM 2020.

Hann vill að sviðsljósið beinist að leikmönnum Íslands á heimsmeistaramótinu í Egyptalandi. „Fókusinn á ekki að vera á mér. Það kom strax út að ég gæti ekki spilað á þessu HM samkvæmt læknisráði íslensku læknanna og þar við sat. Ég er þá bara í rauninni þá bara áhorfandi, en auðvitað hluti af liðinu. Ég vil svona helst að við náum að setja fókusinn á liðið og styðja þá. Ég er þeirra aðal aðdándi í dag og helsta klappstýra og auðvitað vona að þeir standi sig sem best.“

„Mun alltaf gefa kost á mér svo lengi sem líkaminn leyfir“

Aron segist ekki vita hvenær hann snýr aftur inn á keppnisvöllinn. „Maður auðvitað reynir allt sem maður getur til að komast sem fyrst inn á gólf. Ég mun alltaf gefa kost á mér svo lengi sem líkaminn leyfir.“

Nánar verður rætt við Aron Pálmarsson í íþróttafréttum RÚV klukkan 19:25 í kvöld og í HM stofunni fyrir leik Íslands og Sviss á morgun. HM stofan hefst klukkan 14:00 en leikur Íslands og Sviss klukkan 14:30.