Athugið þessi frétt er meira en 3 mánaða gömul.

Súrt andrúmsloft í höfuðborginni

18.01.2021 - 18:29
Mynd: EPA-EFE / EPA
Andrúmsloftið í höfuðborg Bandaríkjanna virðist vera nokkuð rafmagnað, nú þegar tveir dagar eru í embættistöku Joe Biden, verðandi forseta. Gríðarleg öryggisgæsla er í Washington og fólk beðið um að halda sig fjarri. Þinghúsinu var lokað í dag þegar lítill eldur kviknaði. Rudy Guiliani verður ekki meðal verjenda Donald Trump þegar öldungadeildin tekur fyrir kæru til embættismissis í næstu viku.

Einhvern veginn að verða eðlilegt

Ingólfur Bjarni Sigfússon fréttamaður er í Washington. Hann segir andrúmsloftið í borginni frekar súrt. Fáir eru á ferli, gífurleg öryggisgæsla en svo virðist þetta vera orðin einhvern veginn eðlilegt, nú eftir ár af sóttvarnaraðgerðum og heimsfaraldri. Hann segir að talsverður reykur hafi komið upp af eldinum og mörgum hafi brugðið.  

Guiliani ætlar ekki að vera með

Og svo berast fregnir af því að Rudy Guiliani verði ekki meðal verjenda Donald Trump þegar öldungadeildin tekur fyrir kæru til embættismissis í næstu viku. 

„En ekki af því að hann vill það ekki eða er súr yfir því að Trump greiði ekki reikningana, heldur vegna þess að hann var einn þeirra sem hélt eldræðu miðvikudaginn 6. janúar áður en múgurinn réðst á þingið, svo hann telst vitni. Eða það er opinber skýring, í það minnsta,” sagði Ingólfur Bjarni í kvöldfréttatímanum.  

Skoða nýja embættismenn Biden

Þingnefndir byrja að skoða þá sem Biden hefur tilnefnt í lykilembætti á morgun, daginn áður en Biden verður settur í embætti. 

„Það er alvanalegt að væntanlegir ráðherrar og yfirmenn lykilstofnana séu teknir til skoðunar all nokkru fyrir embættistöku nýs forseta, en það óvenjulega er það hafi ekki gerst fyrr. Þetta er eiginlega óvenjuseint og gæti hugsanlega flækst eitthvað fyrir, fyrstu daga Bidens í embætti.”

Hægt er að hlusta á viðtal við Ingólf Bjarna í kvöldfréttum 18. janúar 2021 í spilaranum hér að ofan.